އެސްޓީއޯއިން ވިއްކާ ކާޑުގެ ބާވަތްތަކާއި ތެލުގެ އަގު ރައީސުލްޖުމްހޫރިއްޔާގެ ޚާއްޞަ އިސްނެންގެވުމެއްގެ ދަށުން ހެޔޮކުރައްވަން ނިންމަވައިފިއެވެ. އެސްޓީއޯއިން މިއަދު ހާމަކުރެއްވި ގޮތުގައި ކާޑުގެ ބާވަތްތަކާއި ތެޔޮ ހެޔޮއަގުގައި އަންނަ އާދީއްތަ ދުވަހުން ފެށިގެން ވިއްކަމުން ގެންދާނެއެވެ.
ރައީސުލްޖުމްހޫރިއްޔާގެ މި ނިންމެވުމާ އެއްގޮތަށް ހަނޑުލާއި ހަކުރުން 15 އިންސައްތަ، ފުށުން 12 އިންސައްތަ އަގު ހެޔޮކުރާނެކަން އެސްޓީއޯއިން ވަނީ ހާމަކޮށްފައެވެ.
އެސްޓީއޯއިން ވިއްކާ ކާޑާއި ތެލުގެ އަގަށް ދާދިފަހުން ގެނެސްފައިވާ ބަދަލާއެކު، އަގު ބޮޑުވެފައިވާތީ، އެބާވަތްތަކުގެ އަގު ހެޔޮކުރުމާ ބެހޭގޮތުން ރައީސް ޢަބްދުﷲ ޔާމީންގެ އިސްނެންގެވުމަކަށް، ރައީސް އޮފީހުގެ އިކޮނޮމިކް ކައުންސިލާއި އެސްޓީއޯއާ ދެމެދު ދިޔައީ މަޝްވަރާކުރަމުންނެވެ. ކާޑުގެ ބާވަތްތަކާއި ތެލުގެ އަގު ހެޔޮކުރަން މިނިންމީ މިމަޝްވަރާތަކުގެ ނަތީޖާއެއްގެ ގޮތުންނެވެ.
އެސްޓީއޯއިން ވިއްކަމުން އައި ކާޑުގެ ބާވަތްތަކުގެ ސަބްސިޑީޒް ކަނޑުއްވާލެއްވުމާ ގުޅިގެން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ، ކާޑުގެ އަގުތައް އަލުން މުރާޖަޢާކުރައްވަމުން ގެންދަވާނެކަމަށް ވިދާޅުވެފައެވެ. އެއަށްފަހު ސަރުކާރުގެ ކުންފުނިތަކާއި މުއައްސަސާތަކާ މަޝްވަރާކުރައްވައި ކާޑުގެ އަގު ހެޔޮކުރުމަށް އެޅެންހުރި ހުރިހާ ފިޔަވަޅުތަކެއް އެޅުމަށް އެސްޓީއޯއަށް ރައީސުލްޖުމްހޫރިއްޔާ ވަނީ އަންގަވާފައެވެ.