މިނިސްޓްރީން ދެއްވި މުއްދަތުގައި އަހަރީފީއާއި ޖޫރިމަނާ ފީތައް ނުދައްކާ ކުންފުނިތަކަށް އިތުރު ފުރުޞަތެއް ދިނުމަށްފަހު ޖޫރިމަނާ ފީތައް ނުދައްކާ ކުންފުނިތައް މިނިސްޓްރީގެ ދަފްތަރުން އުނިކުރުމަށް ހަމަޖެހިފައިވާ ކަމަށް އިކޮނޮމިކް މިނިސްޓްރީން ހާމަކުރައްވައިފިއެވެ.
އިކޮނޮމިކް މިނިސްޓްރީން ވިދާޅުވީ ރާއްޖޭގައި ރަޖިސްޓްރީކޮށްފައިވާ ކުންފުނިތަކުގެ ތެރެއިން އަހަރީފީއާއި ޖޫރިމަނާ ފީތައް ނުދައްކާ ކުންފުނިތަކަށް ފައިސާ ދެއްކުމަށް މިއަހަރުގެ މާރޗުމަހުގެ އެއްވަނަ ދުވަހުން އެއްމަސްދުވަހުގެ މުއްދަތެއް ދެއްވާފައިވާކަމަށެވެ. އެގޮތުން ދެއްވި މުއްދަތު ހަމަވިއިރު، 355 ކުންފުންޏަކުން އެހެން ފަރާތަކަށް ދައްކަންޖެހޭ ފީ އަދި ޖޫރިމަނާތަކުގެ ތަފްސީލްތައް އިކޮނޮމިކް މިނިސްޓްރީއާ ހިއްސާކޮށްފައިވާ ކަމަށެވެ. އަދި 22 ކުންފުންޏަކުން، ދައުލަތުން ދައްކަންޖެހޭ ފައިސާ ދެއްކުމަށްފަހު އެކަމާއިގުޅޭ މައުލޫމާތު އިކޮނޮމިކް މިނިސްޓްރީއާ ހިއްސާކޮށްފައިވާ ކަމަށް އެމިނިސްޓްރީން ހާމަކުރެއެވެ.
މިކަމާއި ގުޅޭގޮތުން މައުލޫމާތުދެއްވަމުން ރެޖިސްޓްރަރ އޮފް ކޮމްޕެނީސް މަރިޔަމް ވިސާމް ވިދާޅުވީ، އެމިނިސްޓްރީން އާއްމުކުރި ލިސްޓުގައި އަހަރީފީއާއި ޖޫރިމަނާ ފީތައް ނުދައްކާ ހަހާސް ތިންސަތޭކަ ނުވަ ކުންފުންޏެއް ހިމެނޭ ކަމަށެވެ. އަދި މިހާތަނަށް އަހަރީފީއާއި ޖޫރިމަނާ ފީތައް ނުދައްކާ ކުންފުނިތަކަށް އިތުރު މުއްދަތެއް ދެއްވުމަށްފަހު އެކުންފުނިތައް އެމިނިސްޓްރީގެ ދަފްތަރުން އުވާލުމަށް ހަމަޖެހިފައިވާ ކަމަށް ވިސާމް ވިދާޅުވިއެވެ.
ލިސްޓުގައި ހިމެނޭ ކުންފުންޏެއްގެ ނަން ކުންފުނިތަކުގެ، ދަފްތަރުން އުނިކުރުމަށް ބޭނުން ނުވާނަމަ، އެކުންފުންޏަކުން ދައްކަންޖެހޭ އަހަރީފީ އާއި ޖޫރިމަނާ ފައިސާ ދައްކައި ޚަލާޞްކުރުމަށްފަހު، ފައިސާ ދެއްކި ކަމުގެ ރަސީދު އިކޮނޮމިކް މިނިސްޓްރީއަށް ހުށަހަޅަން ޖެހޭނެ ކަމަށް އެމިނިސްޓްރީން ހާމަކުރައްވައެވެ.