އެސްޓީއޯގެ ހުސްވި އަހަރުގެ ވިޔަފާރީގެ ފައިދާއިން ޙިއްޞާއަކަށް ފަންސާސް އެއް ރުފިޔާ ބަހަން ހުށަހެޅުމަށް އެކުންފުނީގެ ޑިރެކްޓަރުންގެ ބޯޑުން ނިންމައިފިއެވެ.
މިގޮތަށް ނިންމާފައިވަނީ، މިދިޔަ އަންގާރަދުވަހު ބޭއްވި އެސްޓީއޯގެ ޑިރެކްޓަރުންގެ ބޯޑުގެ ބައްދަލުވުމުގައެވެ. އެސްޓީއޯގެ ބޯޑުގެ މި ނިންމުމާއެކު ޙިއްސާއަކަށް ބެހުމަށް ނިންމި އަދަދު ފާސްކުރުން އޮންނާނީ މިއަހަރު ބާއްވާ އެކުންފުނީގެ އަހަރީ އާއްމުޖަލްސާގައެވެ.
އެސްޓީއޯއަށް މިދިޔަ އަހަރު ސާފުފައިދާގެ ގޮތުގައި ތިންސަތޭކަ މިލިއަނަށްވުރެ ގިނަ ރުފިޔާ ލިބިފައިވެއެވެ. އެސްޓީއޯގެ ހުސްވިއަހަރުގެ ވިޔަފާރީގެ ފައިދާއިން ޙިއްސާއަކަށް ފަންސާސް އެއްރުފިޔާ ބެހުމަށް އެކުންފުނީގެ ޑިރެކްޓަރުންގެ ބޯޑުން ނިންމާފައިވާއިރު، ދެހާސް ފަނަރަވަނަ އަހަރު ޙިއްސާގެ ފައިދާގެ ގޮތުގައި ބަހާފައިވަނީ ޙިއްސާއަކަށް ފަންސާސް ހަތް ރުފިޔާއެވެ.