75 ސްޓޯލާ އެކު "ހެޕީ ރަމަޟާން 2017" ފަށައިފިއެވެ.
ރޯދަމަހަށް ޙާއްސަ ކޮށްގެން، ދިވެހި އެކްސްޕޯއިން އިންތިޒާމްކޮށްގެން ބާއްވާ "ހެޕީ ރަމަޟާން އެކްސްޕޯ" ކުރިއަށްދަނީ ދަރުބާރުގޭގައެވެ. 3 ދުވަހުގެ މުއްދަތަކަށް ކުރިއަށްދާ މި އެކްސްޕޯގައި މިއަހަރު ދިވެހި ވިޔަފާރިވެރިންގެ އިތުރުން އިންޑިއާގެ ގިނަ ޢަދަދެއްގެ ވިޔަފާރިވެރިންވެސް ބައިވެރިވެފައިވެއެވެ.
"ހެޕީ ރަމަޟާން2017 " ހުޅުއްވައިދެއްވީ އިސްލާމިކް މިނިސްޓްރީގެ ސްޓޭޓް މިނިސްޓަރ އިބްރާހިމް އަހުމަދުއެވެ. އެކްސްޕޯ ހުޅުއްވައި ދެއްވުމަށްފަހު ސްޓޭޓް މިނިސްޓަރ ވަނީ އެކްސްޕޯގެ ސްޓޯލްތައް ބައްލަވާލައްވާފައެވެ.
އިންޑިއަން ހައިކޮމިޝަނާ ގުޅިގެން މިއަހަރުގެ އެކްސްޕޯގައި ޚާއްސަ ޙަރަކާތްތަކެއް ކުރިއަށް ގެންދިޔުމަށް ވަނީ ނިންމާފައެވެ. އެގޮތުން މި އެކްސްޕޯގައި އިންޑިއާއަށް ޚާއްސަ ޕެވިލިއަންއެއް ހިމެނެއެވެ. މިއަހަރުގެ އެކްސްޕޯގައި 75 ސްޓޯލް ބެހެއްޓިފައި ހުރިއިރު އިންޑިއާގެ 29 ކުންފުންޏަކުން 55 މީހުން ބައިވެރިވެއެވެ.
ޕީއެސްއެމްއަށް މަޢުލޫމާތުދެއްވަމުން ދިވެހި އެކްސްޕޯގެ މެނޭޖަރ ފާޠިމަތު ޒާލީ ވިދާޅުވީ އެކްސްޕޯ ކުރިއަށް ދާނީ މިމަހުގެ 29ހުގެ ނިޔަލަށް ކޮންމެ ދުވަހެއްގެވެސް މެންދުރުފަހު 3:00 އަކުން ރޭގަނޑު 11:00 އަށް ކަމަށެވެ. މިއަހަރުގެ އެކްސްޕޯގައި ރާއްޖެއިން ބައިވެރިވެފައިވާ ފަރާތްތަކުން ހާމަކުރާގޮތުގައި މިއެކްސްޕޯގައި ތަކެތި ވިއްކުމަށް ހަމަޖެހިފައިވަނީ ޑިސްކައުންޓް އަގުތަކެއްގައެވެ. އާއްމުންގެ ރަނގަޅު ތަރުހީބެއް ލިބޭނެ ކަމަށް އުއްމީދު ކުރާ ކަމަށްވެސް އެފަރާތްތަކުން ބުނެއެވެ.
މިއަހަރުގެ އެކްސްޕޯގައި ހެނދުނު ދަންފަޅީގައި ކުރިއަށްގެންދިޔުމަށް ހަމަޖެހިފައިވަނީ ވިޔަފާރިތަކުގެ ބައްދަލުވުންތަކެކެވެ. މި ބައްދަލުވުންތަކުގައި ދިވެހި ވިޔަފާރިވެރިންގެ ޤައުމީ ޖަމްޢިއްޔާ އާއި ފެޑަރޭޝަން އޮފް އިންޑިއަން އެކްސްޕޯޓް އޮގަނައިޒޭޝަނުގައި ހިމެނޭ ކުންފުނިތައް ބައިވެރިވެއެވެ.