އިންޖީނުގެ ހޫނުން އުފެދޭ ފެން، ބޯފެނުގެ ގޮތުގައި ފުޅީގައި ބަންދުކޮށް ވިއްކަން ފެށުމަށް ތައްޔާރުވަމުންދާކަމަށް ސްޓެލްކޯއިން ހާމަކޮށްފިއެވެ.
އަންނަ މަހުގެތެރޭ ބާޒާރަށް ނެރުމަށް މަސައްކަތް ކުރަމުންދާ މި ފެން ވިއްކުމަށް ހަމަޖެހިފައިވަނީ ހޯލްސޭލްކޮށް ކަމަށް ސްޓެލްކޯއިން ބުނެއެވެ.
"ސްޓެލްކޯ ފެން" މި ނަމުގައި ތަޢާރަފްކުރާ މި ފެން ބާޒާރަށް ނެރުމަށް ހަމަޖެހިފައިވަނީ 5 ސައިޒެއްގެ ފުޅީގައި ބަންދުކޮށްގެން ކަމަށް ސްޓެލްކޯއިން ބުނެއެވެ. އެއީ، 330 އެމްއެލް، 500 އެމްއެލް އަދި އެއް ލީޓަރާއި 1.5 ލީޓަރު އަދި 5 ލީޓަރުގެ ފުޅީގައެވެ.
ސެޓެލްކޯއިން މިހާރުވަނީ ފެން ވިއްކާނެ އަގުތައްވެސް އާއްމުކޮށްފައެވެ. ސްޓެލްކޯ ފެން ގަންނަ ކޮންމެ 10 ކޭހަކުން އެއް ކޭސް ފެން ހިލޭ ލިބޭނެ ކަމަށާއި 20 ކޭހަށް ވުރެ ގިނައިން ނަގާ ނަމަ ހިލޭ ގެންގޮސްދޭނެ ކަމަށްވެސް އެ ކުންފުނިން ހާމަކުރެއެވެ.