15 ކުންފުންޏަކާއެކު "މޯލްޑިވްސް ކޮންސިއުމަރ ފެއަރ" ފަށައިފިއެވެ.
ރާއްޖޭގައި ބާއްވާ އެންމެ ބޮޑު ޝޮޕިންގ ފެސްޓިވަލް، "މޯލްޑިވްސް ކޮންސިއުމަރ ފެއަރ" ކުރިއަށްދާނީ، އަންނަ ހޮނިހިރު ދުވަހުގެ ނިޔަލަށް ނޭޝަނަލް އާޓް ގެލެރީގައެވެ. މި ފެއަރގައި ތަފާތު އެކި ވައްތަރުގެ މުދާ، ޑިސްކައުންޓް އަގުތަކުގައި ލިބެން ހުންނާނެ ކަމަށާއި، ފެއަރގައި ހިމެނޭ ކާބޯތަކެތީގެ ރަހަ ބެލުމުގެ ފުރުޞަތާއި، ޚާއްޞަ ހަދިޔާތައް ލިބެން ހުންނާނެ ކަމަށް މި ފެއަރ އިންތިޒާމްކުރާ ބްލަކް ޕްރައިވެޓް ލިމިޓެޑުން ބުނެއެވެ.\
މިފެއަރ މިއަދު ރަސްމީގޮތުން ހުޅުއްވައިދެއްވީ މޯލްޑިވްސް ޕޯޓްސް ލިމިޓެޑްގެ ސީއީއޯ އިބްރާހިމް އަބްދުއްރައްޒާޤު ޚަލީމެވެ.
img:http://s2.psmnews.mv/images/660x400/14939022271901.jpg|ކޮންސިއުމަރ ފެއަރ ހުޅުވުމުގެ ރަސްމިއްޔާތުގައި އެމްޕީއެލްގެ ސީއީއޯ ވާހަކަފުޅުދައްކަވަނީ / ފޮޓޯ: ޕީއެސްއެމް
މޯލްޑިވްސް ކޮންސިއުމަރ ފެއަރގައި، ޢާންމުކޮށް ގޭތެރޭގައި ގެންގުޅޭ ސާމާނާއި އިލެކްޓްރޯނިކް ސާމާނާއި ކާބޯތަކެތީގެ ބާވަތްތަކާއި އަލަށް މާރކެޓަށް ނެރުމަށް ހަމަޖެހިފައިވާ އުފެއްދުންތައް ދައްކާލާނެކަމަށް ބްލަކް ޕްރައިވެޓް ލިމިޓެޑުން ބުނެއެވެ. މިފަހަރުގެ ފެއަރއަށް ޒިޔާރަތްކުރާ މީހުންގެ މެދުގައި ކޮންމެ ގަޑިއަކު އެއްފަހަރު ލަކީޑްރޯއެއް ނެގުމަށް ވަނީ ހަމަޖެހިފައެވެ. އަދި ކޮންމެ ދުވަހަކު ގްރޭންޑް ޕްރައިޒް ވިނަރއެއް ހޮވުމަށް ހަމަޖެހިފައެވެ. މިއީ، މޯލްޑިވްސް ކޮންސިއުމަރ ފެއަރ ބާއްވާ 5 ވަނަ ފަހަރުއެވެ. މޯލްޑިވްސް ކޮންސިއުމަރ ފެއަރއަކީ، ހޯލްސޭލް ވިޔަފާރިވެރިންނާއި ރީޓެއިލް ވިޔަފާރިވެރިންނާއި ސަޕްލަޔަރުންނާއި މެނުފެކްޓްޗަރުންނަށް ޚާއްޞަ ޕްލެޓްފޯމެކެވެ.