ސިންގަޕޫރުގައި ހުންނަ ދިވެހިރާއްޖޭގެ އެމްބަސީއާއި އިންޓަރނޭޝަނަލް އިންޓަރޕްރައިސް ސިންގަޕޫރު، ގުޅިގެން ބޭއްވި ބިޒްނަސް ފޯރަމްގައި އިކޮނޮމިކް މިނިސްޓްރީގެ އިންވެސްޓް މޯލްޑިވްސްއާއި ސަރުކާރުގެ ކަމާބެހޭ އިދާރާތަކުން ބައިވެރިވެއްޖެއެވެ.
ސިންގަޕޫރުގައި ބޭއްވި މި ފޯރަމްގައި އިކޮނޮމިކް މިނިސްޓްރީގެ އިންވެސްޓް މޯލްޑިވްސްގެ އިތުރުން ބައިވެރިވެ ވަޑައިގެންނެވި ދިވެހި ސަރުކާރުގެ އިދާރާތަކުގެ ތެރޭގައި ހިމެނެނީ، ހައުސިންގ ޑިވެލޮޕްމަންޓް ކޯޕަރޭޝަން އަދި މޯލްޑިވްސް އިންޓަރގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްއައިޓީޑީސީއެވެ.
މިފޯރަމްގައި އިންވެސްޓް މޯލްޑިވްސްއިން ވަނީ، ދިވެހިރާއްޖޭގައި ހުރި އިންވެސްޓްމަންޓްތަކުގެ ފުރުޞަތުތަކާބެހޭ މައުލޫމާތު ސިންގަޕޫރުގެ އިންވެސްޓަރުންނަށް ދީފައެވެ. މީގެ ތެރޭގައި ސަރުކާރުން ކުރިއަށްގެންދެވުމަށް ނިންމަވާފައިވާ އެސްއީޒެޑް މަޝްރޫޢު ފާހަގަކޮށްލެވެއެވެ.
އިންވެސްޓް މޯލްޑިވްސްއިން ގެންދަވަނީ ބޭރުގެ އިންވެސްޓަރުން ރާއްޖެ ގެނައުމަށް ގިނަ މަސައްކަތްތަކެއް ކުރައްވަމުންނެވެ. މިގޮތުން ކުރައްވަމުންގެންދަވާ މަސައްކަތްތަކުގެ ތެރެއިން އެންމެ ފާހަގަކޮށްލެވެނީ، މޯލްޑިވްސް އިންވެސްޓްމަންޓް ފޯރަމް ނަމުގައި ތަފާތު އެކި ޤައުމުތަކުގައި ބާއްވަމުންގެންދަވާ އިންވެސްޓްމަންޓް ފޯރަމްތަކެވެ. އިންވެސްޓް މޯލްޑިވްސް އިން ވަނީ، ސިންގަޕޫރު، ޗައިނާ އަދި އިންޑިއާގައި މޯލްޑިވްސް އިންވެސްޓްމަންޓް ފޯރަމް ބާއްވާފައެވެ.