މޯލްޑިވްސް ސެކިއުރިޓީޒް ޑިޕޮސިޓަރީ އިން 'އިންފިނިޓީ'ގެ ނަމުގައި އޮންލައިން ޕޯޓަލެއް ތަޢާރަފުކޮށްފިއެވެ.
މޯލްޑިވްސް ސެކިއުރިޓީޒް ޑިޕޮސިޓަރީ، އެމްއެސްޑީއިން ޙިއްސާގެ ބާޒާރުގައި އިންވެސްޓުކުރަން ބޭނުންވާ ފަރާތްތަކަށް ޢަމާޒުކޮށްގެން ތަޢާރަފްކޮށްފައިވާ 'އިންފިނިޓީ' ސެލްފް ސަރވިސް ޕޯޓަލް ފޯރުކޮށްދޭ ޚިދުމަތްތަކުގެ ތެރޭގައި، ޙިއްސާގެ އެކައުންޓު ހުޅުވުމާއި، ޢާންމުންނަށް ޙިއްސާ ވިއްކަން ހުޅުވާލާފައިވާ ކުންފުނިތަކުގެ ޙިއްސާއަށް އޮންލައިންކޮށް ސަބްސްކްރައިބް ކުރުމުގެ ޚިދުމަތް ހިމެނެއެވެ.
އިންފިނިޓީ ފަރުމާކޮށްފައިވަނީ، ޢާންމުންނަށް ފަސޭހައިން ޙިއްސާ ގަނެވޭ ގޮތަށެވެ. އިންފިނިޓީއާބެހޭ ގޮތުން މަޢުލޫމާތު ދެއްވަމުން، އެމްއެސްޑީސީގެ ސީއީއޯ ޙަސަން މަނިކު ވިދާޅުވީ، އިންފިނިޓީ މެދުވެރިކޮށް ސެކިއުރިޓީޒް އެކައުންޓު ހުޅުވުމާއި، ޙިއްސާ ގަތުމުގެ ޚިދުމަތް ތަޢާރަފުކުރުމާއެކު، ޙިއްސާގެ ބާޒާރުންދޭ ޚިދުމަތްތަކުގެ ކަވަރޭޖް ވަރަށް ބޮޑުތަން އިތުރުވެގެންދާނެކަމަށެވެ.
އެގޮތުން އަތޮޅު ތެރޭގައި ހުރެގެންވެސް، އެކައުންޓު ހުޅުވުމާއި ޙިއްސާ ގަތުމަށް އެދެވޭނެކަމަށް އޭނާ ވިދާޅުވިއެވެ. އަދި މިވަގުތު ޙިއްސާ ވިއްކަން ހުށައަޅާފައިވާ އުރީދޫގެ ޙިއްސާ ބޭނުންވާ ފަރާތްތަކަށް، ބީ.އެމްއެލްގެ ޕޭމަންޓް ގޭޓްވޭ، އެމް.އައި.ބީގެ ޕޭމަންޓް ގޭޓްވޭ އަދި އުރީދޫ-އެމް ފައިސާ ބޭނުންކޮށްގެން ފައިސާ ދެއްކޭނެ ކަމަށް ޙަސަން މަނިކު ވިދާޅުވިއެވެ.