ދިވެހިރާއްޖޭގެ އިޤްތިޞާދަށް ބޭރުގެ އިންވެސްޓަރުން ޝައުޤުވެރިކުރުވުމަށްޓަކައި ޕްރޮފެޝަނަލް ގޮތެއްގައި، ޕެންޝަން ފަންޑު މެނޭޖްކޮށް އޭގެ ނަފާ އިތުރުކުރުމަކީ، މިވަގުތަށް ވަރަށް މުހިއްމު ކަމަށް އޮޑިޓަރ ޖެނެރަލް ޙަސަން ޒިޔަތު ވިދާޅުވެއްޖެއެވެ.
މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އިންތިޒާމްކުރައްވައިގެން މިއަދު ކުރުނބާ މޯލްޑިވްސް ރިސޯޓްގައި ފެއްޓެވި، މޯލްޑިވްސް ފައިނޭންސް ފޯރަމް ޝަރަފްވެރިކޮށްދެއްވައި ވާހަކަ ދައްކަވަމުން އޮޑިޓަރ ޖެނެރަލް ވިދާޅުވީ, ބޭރުގެ އިންވެސްޓަރުން ޝައުޤުވެރިކުރުވުމަށްޓަކައި ޕްރޮފެޝަނަލް ގޮތެއްގައި ފަންޑު މެނޭޖުކުރުމުގެ އިތުރުން ރިސްކް މެނޭޖްކުރުމަކީ މިވަގުތު ދިވެހިރާއްޖޭގެ އިޤްތިޞާދަށް ވަރަށް މުހިއްމުކަމެކެވެ.
img:http://s4.psmnews.mv/images/660x400/14945004614084.jpg|ފައިނޭންސް ފޯރަމް ހުޅުވުމަށް ބޭއްވި ރަސްމިއްޔާތުގައި އޮޑިޓަރ ޖެނަރަލް ވާހަކަފުޅުދައްކަވަނީ / ފޮޓޯ: ޕެންޝަން އޮފީސް
ޕެންޝަން ފަންޑާ ބެހޭގޮތުން އޮޑިޓަރ ޖެނެރަލް ޙަސަން ޒިޔަތް ވިދާޅުވީ، ޕެންޝަން ފަންޑަކީ ވަރަށް ގިނަބައެއްގެ ޙައްޤުތަކެއް އެކުލެވޭ ފަންޑަކަށް ވާތީ، މި ފަންޑު ބެލެހެއްޓުމުގައި ވަރަށް ބޮޑަށް ބައްލަވަން ޖެހޭކަމަށެވެ. މިކަން ކުރުމުގައި ހުރިހާ ފަރާތްތަކުންވެސް ޕެންޝަން އެޑްމިނިސްޓްރޭޝަން އޮފީހުގެ މިނިވަންކަމަށް އިޚްތިރާމްކުރެއްވުމަށާއި އެ މިނިވަންކަން ޙިމާޔަތްކޮށްދިނުމަށް ކަމާބެހޭ ފަރާތްތަކަށް އޮޑިޓަރ ޖެނެރަލް ވަނީ އިލްތިމާސް ކުރައްވާފައެވެ. ހަމަ އެއާއެކު މިކަމުގައި ހުރިހާ ފަރާތެއްގެ އެއްބާރުލުން ޕެންޝަން އެޑްމިނިސްޓްރޭޝަން އޮފީހަށް ބޭނުންވާ މިންވަރު ފާހަގަކުރައްވައި، މި ކަމުގައި އެންމެން އެއް އަމާޒަކަށް މަސައްކަތްކުރުމަކީ މުޅިގައުމުގެ މަސްލަޙަތަށްޓަކައި ނުހަނު ބޭނުންތެރިކަމެއް ކަމަށްވެސް އޮޑިޓަރ ޖެނެރަލް ވިދާޅުވިއެވެ.
ކުރުނބާ ރިސޯޓްގައި މިއަދު ފެށި މޯލްޑިވްސް ފައިނޭންސް ފޯރަމްގައި ދިވެހިރާއްޖޭގެ ފައިނޭންސް ދާއިރާގައި ޙަރަކާތްތެރިވާ ސަރުކާރުގެ މުއައްސަސާތަކާއި ކުންފުނިތަކުގެ އިތުރުން އަމިއްލަ ކުންފުނިތައް ބައިވެރިވާކަން ފާހަގަކޮށްލެވެއެވެ. މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން އިންތިޒާމް ކުރައްވައިގެން ކުރިއަށްދާ މިފަހަރުގެ ފައިނޭންސް ފޯރަމްގެ މެއިން ސްޕޮންސަރަކީ އެލައިޑް އިންޝުއަރަންސްއެވެ.