ހުސްވި އޭޕްރީލްމަހު މޯލްޑިވްސް އިންލަންޑް ރެވެނިއު އޮތޯރިޓީ، މީރާއަށް އެއް ބިލިއަނަށްވުރެ ގިނަ ރުފިޔާ ބަލައިގެންފިއެވެ. ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ، މީރާއިން ވިދާޅުވީ، މިދިޔަ އޭޕްރިލްމަހު އެއޮތޯރިޓީއަށް 1.13 ބިލިއަން ރުފިޔާ ބަލައިގަނެފައިވާކަމަށެވެ. މިއީ، މިދިޔަ އަހަރުގެ އެޕްރީލް މަހާ އަޅާބަލާއިރު 26.5 އިންސައްތަ އިތުރު ޢަދަދެކެވެ. މީގެ މައިގަނޑު ސަބަބަކީ ޖީ.އެސް.ޓީ، ވިތު ހޯލްޑިންގ ޓެކްސް، އެއަރޕޯޓް ސަރވިސް ޗާޖް، ރެމިޓެންސް ޓެކްސް، ޓޫރިޒަމް ލޭންޑް ރެންޓް އެންޑް ލޭންޑް އެކުއިޒިޝަން އެންޑް ކޮންވާޝަން ފީގެ ގޮތުގައި ލިބިފައިވާ ޢަދަދު މިދިޔަ އަހަރުގެ އެޕްރީލް މަހަށްވުރެ އިތުރުވުމެވެ.
އެޕްރީލް މަހު ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ، ޖީ.އެސް.ޓީންނެވެ. ޖީއެސްޓީގެ ގޮތުގައި މިދިޔަ މަހު 658 މިލިއަނަށްވުރެ ގިނަ ރުފިޔާ ވަނީ ބަލައިގަނެފައެވެ. އެޕްރީލްމަހު ދެން އެންމެ ބޮޑު އާމްދަނީއެއް ލިބިފައިވަނީ، އެއަރޕޯޓް ސަރވިސް ޗާރޖުންނެވެ. އެއީ، 91 މިލިއަނަށްވުރެ ގިނަ ރުފިޔާއެވެ. މީރާއަށް ބަލައިގަތް އާމްދަނީގެ ތެރޭގައި 43.1 މިލިއަން އެމެރިކާ ޑޮލަރު ހިމެނޭ ކަމުގައި ދައުލަތުގެ ޓެކްސް އިދާރާއިން މައުލޫމާތުދެއްވައެވެ.