މިދިޔަ އަހަރުގެ ހަތަރުވަނަ ކުއާޓަރުގައި ޖީ.އެސް.ޓީ ނުދައްކާ ފަރާތްތަކުގެ ނަންތައް މޯލްޑިވްސް އިންލަންޑް ރެވެނިއު އޮތޯރިޓީ, މީރާއިން އާއްމުކުރައްވައިފިއެވެ.
މީރާއިން އާއްމުކުރައްވާފައިވާ ލިސްޓުގައި މާލެ ސަރަހައްދުގައި ވިޔަފާރިކުރާ ފަރާތްތަކުގެ ތެރެއިން މިދިޔަ އަހަރުގެ ހަތަރުވަނަ ކުއާޓަރުގެ ޖީ.އެސް.ޓީ ބަޔާން ހުށަނާޅާ ފަރާތްތަކާ ޖީ.އެސް.ޓީ ނުދައްކާ ފަރާތްތަކުގެ މައުލޫމާތު ހިމަނާފައިވެއެވެ. މި ލިސްޓުގައި ނުވަދިހަ އެއް ފަރާތެއްގެ ނަން ހިމަނާފައިވާއިރު އޭގެ ތެރޭގައި ޓޫރިޒަމް ދާއިރާގެ ވިޔަފާރިކުރާ 16 ފަރާތަކާއި އެ ނޫން ވިޔަފާރިތައް ކުރާ 75 ފަރާތެއްގެ ނަން ހިމެނެއެވެ.
މިރާ އިން ވިދާޅުވީ، ޖީ.އެސް.ޓީ ނުދައްކާ ފަރާތްތަކުގެ މައުލޫމާތު އާއްމުކުރުމުގެ ކުރިން އެފަރާތްތަކަށް އެކި ފަހަރުމަތިން ފޯނުން ގުޅާ، އެސްއެމްއެސްކޮށް އެ ތަންތަނަށް ޒިޔާރަތް ކޮށްފައިވާނޭކަމަށެވެ. އަދި ޓެކްސް ނުދައްކައިފިނަމަ ކަޑައެޅިފައިވާ އަދަބުތަކާއި ބެހޭ މައުލޫމާތު ދިފައިވާނޭކަމަށްވެސް މީރާއިން ވިދާޅުވެއެވެ.