ކުދި ވިޔަފާރިއާއި މެދުފަންތީގެ ވިޔަފާރި ކުރިއެރުވުމަށް ސަރުކާރުން އުފައްދަވާފައިވާ ބިޒްނަސް ސެންޓަރ ކޯޕަރޭޝަން ލިމިޓެޑްގެ ބޯޑު ސަރުކާރުން އެކުލަވާލައްވައިފިއެވެ.
ޕްރައިވެޓައިޒޭޝަންގެ ބޯޑުގެ ރައީސް މުޙައްމަދު ނިޒާރު ވިދާޅުވީ، ބިޒްނަސް ސެންޓަރ ކޯޕަރޭޝަން ލިމިޓެޑް، ބީސީސީގެ ޗެއާމަނަކަށް ހަމަޖައްސަވާފައިވަނީ އިކޮނޮމިކް މިނިސްޓްރީގެ ބިޒްނަސް ޑިވެލޮޕްމަންޓް ސްޕެޝަލިސްޓް، ޞާލިޙް ޙުސައިންކަމަށެވެ. ބީސީސީގެ މެނޭޖިންގ ޑިރެކްޓަރަކަށް ހަމަޖައްސަވާފައިވަނީ، އިކޮނޮމިކް މިނިސްޓްރީގައި ވެލިއު ޗެއިން ކެޕޭސިޓީ ބިލްޑިންގ ސްޕެޝަލިސްޓް އަޙްމަދު މުމްތާޒްއެވެ.
މި ދެބޭފުޅުންގެ އިތުރަށް ބީސީސީގެ ބޯޑުގެ ޑިރެކްޓަރުންގެ ތެރޭގައި ހިމެނިވަޑައިގަންނަވާ ބޭފުޅުންނަކީ، ޙަސަން މިރާސް، ސާދާ މުޙައްމަދު، އަދި ޢަލީ ނާޝިދުއެވެ.
ދިވެހިރާއްޖޭގެ ކުދި ވިޔަފާރިއާއި މެދުފަންތީގެ ވިޔަފާރިތަކާބެހޭ ސެންޓަރުތައް ހިންގައި އަދި ވިޔަފާރީގެ ދާއިރާ ކުރިއެރުވުމަށް، ބިޒްނަސް ސެންޓަރ ކޯޕަރޭޝަން ލިމިޓެޑުގެ ނަމުގައި ރައީސުލްޖުމްހޫރިއްޔާ އައު ކުންފުންޏެއް އުފައްދަވާފައިވަނީ، މިއަހަރުގެ މާރޗްމަހުގެ ވިހިވަނަ ދުވަހުއެވެ.
ބިޒްނަސް ސެންޓަރ ކޯޕަރޭޝަން ލިމިޓެޑްގެ ބޭނުމަކީ، ދިވެހިރާއްޖޭގައި ހިންގާ ކުދި ވިޔަފާރިތަކާއި، މެދުފަންތީގެ ވިޔަފާރިތަކާބެހޭ ސެންޓަރުތައް ހިންގައި އަދި ވިޔަފާރީގެ ދާއިރާ ކުރިއެރުވުމެވެ. ރައީސުލްޖުމްހޫރިއްޔާގެ ޤަރާރަކުން އުފެއްދަވާފައިވާ މި ކުންފުންޏަކީ ދަރަންޏަށް ޒިންމާވާންޖެހޭ މިންވަރު ކަނޑައަޅާފައިވާ ދިވެހި ސަރުކާރު ސައްތައިން ސައްތަ ޙިއްޞާވާ ކުންފުންޏެކެވެ.