ގޭގައި ތިބެގެން އާމްދަނީ ހޯދުމަށް މަސައްކަތްކުރާ ފަރާތްތަކަށް ޙާއްޞަ ޖަމިއްޔާ "ސަބާ މޯލްޑިވްސް"ގެ އަހަރީ ބާޒާރު މިއަދު ނެޝަނަލް އާޓް ގެލަރީގައި ފަށައިފިއެވެ.
ސަބާ މޯލްޑިވްސްގެ އަހަރީ ބާޒާރު ރަސްމީކޮށް ފައްޓަވައިދެއްވީ އިކޮނޮމިކް މިނިސްޓްރީގެ ރަޖިސްޓްރާ އޮފް ކޮމްޕެނީސް މަރިޔަމް ވިސާމްއެވެ. ނެޝަނަލް އާޓް ގެލަރީގައި މިއަދު ބޭއްވި ސަބާ މޯލްޑިވްސް އަހަރީ ބާޒާރު ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު އަދި ސަބާ މޯލްޑިވްސްގެ ޗެއާޕާސަން އަބުދުﷲ މުޙައްމަދު ވިދާޅުވީ، ސަބާ މޯލްޑިވްސް އުފެދިގެން މިވީ 3 އަހަރުދުވަހުގެ ތެރޭގައި ގިނަ ކާމިޔާބީތަކެއް ހާސިލްކުރެވިފައިވާކަމަށެވެ. މިގޮތުން ގޭގައި ތިބެގެން ތަކެތި އުފައްދާ ފަރާތްތައް އުފައްދާ ތަކެތި މާކެޓްކޮށް އެތަކެތި ބާޒާރުގައި ވިއްކުމަށް އެޖަމިއްޔާއިން ކުރައްވަމުންގެންދަވާ މަސައްކަތްތަކަށް ފުޅާވަމުން އަންނަކަމަށް އަބްދުﷲ މުހައްމަދު ފާހަގަކުރެއްވިއެވެ.
img:http://s1.psmnews.mv/images/660x400/14948564972872.jpg|ސަބާ މޯލްޑިވްސްގެ އަހަރީ ބާޒާރުގެ ތެރެއިން / ފޮޓޯ: ޕީއެސްއެމް ނިއުސް
އަބްދު ﷲ ވިދާޅުވީ ސަބާގެ މެމްބަރުންގެ އަދަދު މިއަދު ހާހަކަށްވުރެ މަތިކަމަށެވެ. ސަބާގެ މެމްބަރުން ބާރުވެރިކުރުވުމަށްޓަކައި ގިނަ މަސައްކަތްތަކެއް އެޖަމިއްޔާއިން ކުރައްވަމުން ގެންދަވާކަމަށެވެ. މިގޮތުން މެމްބަރުން ތަމްރީނުކުރުމާއި، ތަޖުރިބާ ހޯދުމަށްޓަކައި ރާއްޖެއިން ބޭރަށް ދަތުރުތަކެއް ކޮށްފައިވާކަން އަބުދުﷲ މުހައްމަދު ފާހަގަކުރެއްވިއެވެ. އަބުދުﷲ މުހައްމަދު ވިދާޅުވީ ސަބާގެ މެމްބަރުން އުފައްދާ ތަކެތި ވިއްކުމަށް އެޖަމިއްޔާއިން ގިނަ މަސައްކަތްތަކެއް ކުރައްވަމުން ގެންދަވާކަމަށެވެ. މިގޮތުން ކުރިއަށް އޮތްތަނުގައި ސަބާގެ މެމްބަރުންގެ އުފެއްދުންތައް ވިއްކުމަށް ހޮޓެލް ޖެން، އެސްޓީއޯ، އަދި އައިލެންޑް އޭވިއޭޝަނާއެކު ވާހަކަތައް ކުރިއަށް ގެންގޮސްފައިވާކަން އަބުދު ﷲ މުހައްމަދު ފާހަގަކުރެއްވިއެވެ. މީގެ އިތުރުން ސާކް ޤައުމުތަކަށް ސަބާގެ މެމްބަރުންގެ އުފެއްދުންތައް ވިއްކުމަށްޓަކައި ޤައުމުތައް ގުޅިގެން ކުރަންޖެހޭ މުއާމަލާތްތައް ކުރިއަށްދާކަމަށް އަބުދުﷲ ވިދާޅުވިއެވެ.
img:http://s4.psmnews.mv/images/660x400/14948565249826.jpg|ސަބާ މޯލްޑިވްސްގެ އަހަރީ ބާޒާރުގެ ތެރެއިން / ފޮޓޯ: ޕީއެސްއެމް ނިއުސް
ސަބާގެ އަހަރީ ބާޒާރު ފަށްޓަވައިދެއްވުމުގެ ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓްރީގެ ރަޖިސްޓްރާ އޮފް ކޮމްޕެނީސް މަރިޔަމް ވިސާމް ވިދާޅުވީ، ރާއްޖޭގައި މަސައްކަތްތެރި ފަންނުވެރި އަންހެން ކަނބަލުން އެބަތިބިކަމަށާއި، އެފަދަ ފަރާތްތަކުގެ މަސައްކަތް ދައްކާލުމުގެ ފުރުސަތު ލިބިފައިނުވާކަމަށެވެ. ސަބާ އުފެއްދުމުގެ މައިގަނޑު މަޤްސަދަކީ ހުނަރުވެރި މަސައްކަތްތެރިންގެ މަސައްކަތްތައް އާއްމުންނާ ހަމަޔަށް ގެނެސްދީ ވިޔަފާރީގައި އެފަރާތްތަކަށް ކުރިއަށްދިއުމުގެ މަގު ފަހިކޮށްދިނުންކަމަށެވެ. މިމޭރުމުން ވާހަކަފުޅު ދައްކަވަމުން މަރިޔަމް ވިސާމް ވަނީ ސަބާގެ ބޭނުން ހިފައި މަސައްކަތްތަކުގައި ކުރިއަށްދިއުމަށް އިލްތިމާސްކުރައްވާފައެވެ.
ނެޝަނަލް އާޓް ގެލަރީގައި ފެށި ސަބާ މޯލްޑިވްސްގެ އަހަރީ ބާޒާރުގައި އެޖަމިއްޔާގެ މެމްބަރުންގެ ގިނަ އުފެއްދުންތައް ބަހައްޓާފައިވެއެވެ. މީގެ ތެރޭގައި ކާބޯތަކެތީގެ ބާވަތްތަކާއި، އަންނައުނުގެ އިތުރުން ސްވެނިއާގެ އުފެއްދުންތައް ފާހަގަކޮށްލެވެއެވެ. ސަބާ މޯލްޑިވްސް އަކީ ސާކް ޑިވެލޮޕްމަންޓް ފަންޑުގެ ދަށުން 2013 ވަނަ އަހަރު އުފެއްދި ޖަމިއްޔާއެކެވެ.