ދިވެހިރާއްޖެއާއި މެލޭޝިއާ އާއި ދެމެދު ޑަބަލް ޓެކްސް އެވޮއިޑަންސް، ނުވަތަ އެއް އާމްދަނީން ދެ ފަހަރަށް ޓެކްސް ނެގުން ހުއްޓުވުމާއި ބެހޭ އެއްބަސްވުމެއް އެކުލަވާލެއްވުމުގެ މަސައްކަތް ފަށްޓަވައިފިއެވެ.
ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީން ވިދާޅުވީ، ދިވެހި ސަރުކާރުން އިސްނަގައިގެން ދިވެހި ސަރުކާރާއި މެލޭޝިއާ ދެމެދު ޑަބަލް ޓެކްސް އެވޮއިޑަންސް އެއްބަސްވުމެއްގެ ފުރަތަމަ ބުރުގެ މަޝްވަރާތައް މެލޭޝިއާގައި ފަށްޓަވާފައިވާކަމަށެވެ.
ޑަބަލް ޓެކްސް އެވޮއިޑަންސް އެއްބަސްވުމުގެ ސަބަބުން ދެ ގައުމުގެ ވިޔަފާރިތަކުގެ މެދުގައި ކުރެވޭ މުއާމަލާތްތަކުން އެއް އާމްދަނީން ދެ ފަހަރަށް ޓެކްސް ކުރުން ހުއްޓުމަކަށް ގެނެވި، ދެ ގައުމުގެ މެދުގައި ޓެކުހާގުޅޭ މަޢުލޫމާތުތައް ބަދަލުކުރުމަށް މަގުފަހިވެގެންދާނެއެވެ.
މެލޭޝިއާއިން ހެޑް އޮފް ޑެލިގޭޝަންގެ ގޮތުގައި ބައިވެރިވެވަޑައިގެންނެވީ އެޤައުމުގެ މިނިސްޓްރީ އޮފް ފިނޭންސްގެ ޓެކްސް ޑިވިޜަންގެ އަންޑަރ ސެކްރެޓަރީ ދަތޯ ޚަދީޖާ ޢަބްދުﷲއެވެ. އަދި ދިވެހިރާއްޖޭގެ ހެޑް އޮފް ޑެލިގޭޝަންގެ ގޮތުގައި ބައިވެރިވެވަޑައިގެންނެވީ މީރާގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން ހަސަން ޒަރީރުއެވެ. މީރާއިން އަންނަނީ ޓެކްސްގެ ނިޒާމް ހަރުދަނާކުރެއްވުމަށް ގިނަ މަސައްކަތްތަކެއް ކުރައްވަމުންނެވެ.