ދުނިޔޭގެ އެންމެބޮޑު އެއް ކްރެޑިޓް ރޭޓިންގ އޭޖެންސީ، "ފިޗް ރޭޓިންގ" ގައި ދިވެހިރާއްޖޭގެ ސޮވްރިންގ ކްރެޑިޓް ރޭޓިންގ އަށް ބީ ޕްލަސް ލިބިއްޖެއެވެ.
މިއީ މިދިޔަ އަހަރުގެ ސެޕްޓެމްބަރު މަހުގެ ދެވަނަ ދުވަހު މޫޑީސް އިންވެސްޓަރސް އިން ކުރި ކްރެޑިޓް ރޭޓިންގ އަށްވުރެ އެއް ދަރަޖަ މަތީ ރޭޓިންގ އެކެވެ. މޫޑީސް އިންވެސްޓަރސް އިން ކުރި ކްރެޑިޓް ރޭޓިންގގައި ދިވެހިރާއްޖެއަށް ލިބުނީ ބީ ޓޫ އެވެ.
މާހިރުން ވިދާޅުވާގޮތުގައި ކްރެޑިޓް ރޭޓިންގެ ނަތީޖާއަކަށް ބީ ޕްލަސް ލިބުމުން ދައްކުވައިދެނީ އެޤައުމުގެ އިޤްތިޞާދުގެ ދުޅަހެޔޮކަން ރަނގަޅުވުން ކަމަށެވެ. މިގޮތުން ބީ ޕްލަސް ލިބިއްޖެ ނަމަ އެޤައުމަކީ އިންވެސްޓްކުރަން ރަނގަޅު މުސްތަޤްބަލެއް އޮތް ޤައުމެއްކަމަށް އިޤްތިޞާދީ މާހިރުން ފާހަގަކުރައްވައެވެ.
ފިޗް ރޭޓިންގ އިން ކުރި ކްރެޑިޓް ރޭޓިންގ އާއި ބެހޭގޮތުން ނޫސްވެރިންނަށް މައުލޫމާތު ދެއްވަމުން ފިނޭންސް މިނިސްޓަރު އަހުމަދު މުނައްވަރު ވިދާޅުވީ، މިފަހަރުގެ ކްރެޑިޓް ރޭޓިންގ ގައި ލިބުނު ނަތީޖާއަކީ ދިވެހިރާއްޖެއަށް ލިބުނު ވަރަށްބޮޑު ކާމިޔާބީއެއް ކަމަށެވެ. ފިޗް ރޭޓިންގ އިން މައުލޫމާތުދޭގޮތުގައި ކްރެޑިޓް ރޭޓިންގގައި މިފަހަރު ރާއްޖެއަށް މިހާ ރަނގަޅު ނަތީޖާއެއް ލިބިގެންދިޔަ މައިގަނޑު ސަބަބަކީ، ފިސްކަލް ޕޮލިސީއަށް ސަރުކާރުން ގެންނަވަމުންދާ މުހިއްމު ބަދަލުތަކާއި، ދައުލަތުގެ ޚަރަދުތައް ކުޑަކުރެއްވުމަށް ކުރައްވަމުންގެންދަވާ މަސައްކަތްތަކުގެ ސަބަބުން ކަމަށެވެ.
ފިނޭންސް މިނިސްޓަރު އަހުމަދު މުނައްވަރު ވިދާޅުވީ، ފިޗް ރޭޓިންގގެ ކްރެޑިޓް ރޭޓިންގ ނަތީޖާގެ ސަބަބުން ބައިނަލްއަޤްވާމީ މާލީ އިދާރާތަކުގެ މެދުގައި ދިވެހިރާއްޖެއާ މެދު އޮންނަ އިތުބާރު ބޮޑުވެގެންދާނޭ ކަމަށެވެ. img:http://s3.psmnews.mv/images/660x400/14949322582371.jpg|ފިނޭންސް މިނިސްޓަރ އަޙުމަދު މުނައްވަރު - ފޮޓޯ: ޢަލީ ނަޞީރު / ޕީއެސްއެމް
ފިޗް އިން ކުރި ކްރެޑިޓް ރޭޓިންގައި ބީ ޕްލަސް ރާއްޖެއަށް ދީފައިމިވަނީ، ފަތުރުވެރިކަމުގެ ސިނާއަތުގެ ސަބަބުން ރާއްޖޭގެ އިޤްތިޞާދީ ދުވެލި ބާރުމިނެއްގައި ދެމެހެއްޓޭނެ ކަމަށް ފެންނާތީއެވެ. ފިޗް އިން ފާހަގަކުރާ ގޮތުގައި މިހާރު ކުރިއަށްދާ ވެލާނާ އިންޓަރނޭޝަނަލް އެއަރޕޯޓް ތަރައްޤީ ކުރުމުގެ މަޝްރޫއުއާއި، ހުޅުމާލެ ޔޫތް ސިޓީ މަޝްރޫއުގެ ސަބަބުން ކުރިއަށްއޮތްތަނުގައި ރާއްޖޭގެ ޓޫރިޒަމަށް އިތުރު ކުރިއެރުން ލިބިގެންދާނެއެވެ.
މީގެ އިތުރުން ދައުލަތުގެ އާމްދަނީ އިތުރުކުރެއްވުމަށް ހުރި ފުރުސަތުތަކާއި ޚަރަދު ކުޑަކުރެއްވުމަށް އަދުގެ ސަރުކާރުން އަޅުއްވަމުންގެންދަވާ މުހިއްމު ފިޔަވަޅުތަކުގެ ސަބަބުން ދައުލަތުގެ ފިސްކަލް ބެލެންސް ކުރިއަށްއޮތް އަހަރުތަކުގައި ރަނގަޅުވެގެންދާނޭ ކަމަށް ފިޗް އިން ދެކެއެވެ.
ދިވެހިރާއްޖެގެ އިޤްތިޞާދު ފަތުރުވެރިކަމަށް ބަރޯސާވެފައިވުމުގެ ސަބަބުން ރާއްޖެއާއި ރާއްޖެއިން ބޭރުން ކުރިމަތިވެދާނެ ކަމަކުން ރާއްޖޭގެ ފަތުރުވެރިކަމާއި ރާއްޖޭގެ އިޤްތިޞާދަށް އެކަމުގެ ނޭދެވޭ އަސަރު ކުރާކަން ފިޗްއިން ވަނީ ފާހަގަކޮށްފައެވެ. މިގޮތުން ރާއްޖޭގެ އިޤްތިޞާދު ފުޅާކޮށް އެހެނިހެން ސިނާއަތްތައް ތަރައްޤީކުރުމާއި ދައުލަތުގެ ރަސްމީ ރިޒާވް އިތުރުކުރުމާއި ދައުލަތުގެ ދަރަނި ކުޑަކުރުމަކީ މުސްތަޤްބަލުގައި ރާއްޖޭގެ ރޭޓިންގ ރަނގަޅުކުރެވޭނެ ގޮތްތައް ކަމުގައި ފިޗް އިން ވަނީ ފާހަގަކޮށްފައެވެ.
ފިނޭންސް މިނިސްޓަރު އަހުމަދު މުނައްވަރު ވިދާޅުވީ، ފިޗް އިން ފާހަގަކޮށްފައިވާ ރިސްކުތައް ދެނެގަނެ، އެ ރިސްކުތައް ކުޑަކުރެއްވުމަށް ސަރުކާރުން ފިޔަވަޅުތައް އަޅުއްވަމުން ގެންދަވާ ކަމަށެވެ.
ފިނޭންސް މިނިސްޓަރު މިގޮތަށް ވިދާޅުވެފައިވާއިރު، ސަރުކާރުން ގެންދަވަނީ ރާއްޖޭގެ އިޤްތިޞާދު ފުޅާކޮށް ޑައިވަރސިފައި ކުރެއްވުމަށް އިންވެސްޓްމަންޓްތަކަށް ހުޅުވާލެވިފައިވާ މާހައުލެއް ޤާއިމްކުރެއްވުމަށް މަސައްކަތް ކުރައްވަމުންނެވެ.