ރަމަޟާންމަހަށް ޙާއްސަކޮށްގެން މޯލްޑިވް ގޭހުން، ގޭބިސީތަކަށް ވިއްކާ ކައްކާ ގޭހުގެ އަގުހެޔޮކުރަން ނިންމައިފިއެވެ.
މޯލްޑިވް ގޭހުގެ މެނޭޖިންގ ޑިރެކްޓަރ އަބްދުﷲ މައުމޫން ވިދާޅުވީ، މާދަމާއިން ފެށިގެން ގޭބިސީތަކުގައި ބޭނުންކުރާ 10 ކިލޯގެ ގޭސްފުޅީގެ އަގު 175 ރުފިޔާއަށް ހެޔޮކޮށްފައިވާކަމަށެވެ. އަގުހެޔޮކުރުމުގެ ކުރިން 10 ކިލޯގެ ގޭސްފުޅިއެއް މިހާތަނަށް ވިއްކަމުން އައިސްފައި ވަނީ ދުއިއްސައްތަ ރުފިޔާއަށެވެ.
މައުމޫން ވިދާޅުވީ، މޯލްޑިވް ގޭހުގެ އަގު ހެޔޮކުރަން ނިންމީ، ކުރިއަށްއޮތް ރަމަޟާންމަހު އާއްމު ރައްޔިތުންނަށް ލުއިފަސޭހަ ގޮތެއް ހޯދައިދިނުމުގެ ގޮތުން ރައީސުލްޖުމްޚޫރިއްޔާ އަބުދުﷲ ޔާމީނުގެ އިސްނެންގެވުމުގެ މަތިންކަމަށެވެ. މައުމޫން ވިދާޅުވީ އަތޮޅުގެ ރަށްތަކުގައި ވިއްކާ ގޭހުންވެސް މާދަމާއިން ފެށިގެން 25 ރުފިޔާ އަގު ހެޔޮވެގެންދާނޭކަމަށެވެ.
މި ޚާއްޞަ އަގުގައި ގޭސް ވިއްކަމުންދާނީ، މާދަމާއިން ފެށިގެން ރަމަޟާންމަހުގެ 6 ރޯދައިގެ ނިޔަލަށްކަމަށްވެސް މޯލްޑިވް ގޭހުން މައުލޫމާތުދެއެވެ. މޯލްޑިވް ގޭހުން އެންމެފަހުން ގޭހުގެ އަގަށް ބަދަލު ގެނެސްފައިވަނީ، މިދިޔަ އަހަރުގެ ޖޫންމަހުގެ އެއްވަނަ ދުވަހުއެވެ.