ދިވެހިރާއްޖޭގައި އިސްލާމިކް ފައިނޭންސް ކުރިއެރުވުމަށް ކުރެވެންހުރި ހުރިހާ މަސައްކަތެއް ސަރުކާރުން ކުރައްވާނޭކަމަށް މިނިސްޓަރ އޮފް ހޯމް އެފެއާޒް، އަޒްލީނު އަހުމަދު ވިދާޅުވެއްޖެއެވެ.
ހޯމް މިނިސްޓަރ އަޒްލީނު އަހުމަދު މިގޮތަށް ވިދާޅުވެފައިވަނީ، އިސްލާމިކް ޑިވޮލޮޕްމަންޓް ބެންކްގެ އިސްލާމިކް ރިސަރޗް އެންޑް ޓްރޭނިންގ އިންސްޓިޓިއުޓް އާއި މޯލްޑިވްސް ސެންޓަރ ފޮރ އިސްލާމިކް ފިނޭންސްގެ ސައުތު އޭސިއަން އިންސްޓިޓިއުޓް ފޮރ އިސްލާމިކް ފިނޭންސް ގުޅިގެން ކުރިއަށްގެންދިޔަ ވޯކްޝޮޕް ނިންމުމުގެ ރަސްމިއްޔާތް ޝަރަފްވެރިކޮށްދެއްވައި ވާހަކަފުޅު ދައްކަވަމުންނެވެ.
"ލިކިއުޑިޓީ މެނޭޖްމަންޓް އިން އިސްލާމިކް ބޭންކިންގް" މި ނަމުގައި ކުރިއަށްދިޔަ ވޯކްޝޮޕް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އަޒްލީނު ވިދާޅުވީ، ދިވެހިރާއްޖޭގައި އިސްލާމިކް ފައިނޭންސް ކުރިއެރުވުމުގެ ގޮތުން ކަމާއި ބެހޭ މުއައްސަސާތަކަށް ސަރުކާރުން ދެއްވަންޖެހޭ އެއްބާރުލުން އެންމެ ފުރިހަމަގޮތުގައި ދެއްވަމުން ގެންދަވާނޭކަމަށެވެ.
img:http://s3.psmnews.mv/images/660x400/14951168347199.jpg|ލިކިއުޑިޓީ މެނޭޖްމަންޓް އިން އިސްލާމިކް ބޭންކިންގް ވޯކްޝޮޕް ނިންމުމުގެ ރަސްމިއްޔާތުގައި ހޯމް މިނިސްޓަރ ވާހަކަފުޅުދައްކަވަނީ / ފޮޓޯ: ޕީއެސްއެމް
މިސަރަހައްދުގެ އިސްލާމިކް ފައިނޭންސްގެ ހަބަކަށް ދިވެހިރާއްޖެ ހެއްދެވުމަށް ރައީސުލްޖުމްހޫރިއްޔާ ގެންގުޅުއްވާ އަމާޒަށް ވާސިލްވުމުގައި ސަރުކާރުގެ ކަމާއި ބެހޭ އިދާރާތަކުން ކުރައްވަންޖެހޭ މަސައްކަތްތައް ވަރަށް އެދެވޭ ގޮތެއްގައި ކުރައްވަމުން ގެންދަވާކަމަށް މިނިސްޓަރ އަޒްލީން ފާހަގަކުރެއްވިއެވެ. މިމޭރުމުން ވާހަކަފުޅު ދައްކަވަމުން މިނިސްޓަރ އަޒްލީން ވަނީ ރާއްޖޭގައި އިސްލާމިކް ފައިނޭންސް ކުރިއެރުވުމަށް މޯލްޑިވްސް ސެންޓަރ ފޮރ އިސްލާމިކް ފިނޭންސުން ކުރައްވަމުން ގެންދަވާ މަސައްކަތްތައް ފާހަގަކުރައްވާފައެވެ. މިގޮތުން އިސްލާމިކް ފައިނޭންސް އާ ގުޅުންހުރި މިފަދަ ވަރކްޝޮޕްތައް ކުރިއަށްގެންދިއުމުގެ މުހިއްމުކަންވެސް މިނިސްޓަރ ވަނީ ފާހަގަކުރައްވާފައެވެ.
3 ދުވަހުގެ މުއްދަތަކަށް ކުރިއަށްގެންދިޔަ މި ވޯކްޝޮޕްގައި ރާއްޖޭގެ މާލީ ދާއިރާގައި ހަރަކާތްތެރިވާ މުއައްސަސާތަކުން ވަނީ ބައިވެރިވެފައެވެ. މި ވޯކްޝޮޕްގެ ބައިވެރިންނަށް ކިޔަވައިދެއްވާފައިވަނީ އިސްލާމިކް ޑިވޮލޮޕްމަންޓް ބެންކްގެ އިސްލާމިކް ރިސަރޗް އެންޑް ޓްރޭނިންގ އިންސްޓިޓިޔުޓްގެ ތަޖުރިބާކާރު ބޭފުޅުންގެ އިތުރުން މޯލްޑިވްސް ސެންޓަރ ފޯ އިސްލާމިކް ފައިނޭންސްގެ ޗެއާމަން ޑރ އާއިޝަތު މުނީޒާއެވެ.