އެނަޖީ އެފިޝެންސީ ދާއިރާގައި އަދުގެ ސަރުކާރުން މިހާތަނަށް ކާމިޔާބު މަސައްކަތްތަކެއް ކުރައްވާފައިވާ ކަމަށް، މިނިސްޓަރ އޮފް ސްޓޭޓް ފޯ އެންވަޔަރަމަންޓް އެންޑް އެނަރޖީ އަބުދުލް މަތީން މުހައްމަދު ވިދާޅުވެއްޖެއެވެ.
މަތީން މިހެން ވިދާޅުވެފައިވަނީ، މިނިސްޓްރީ އޮފް އެންވަޔަރަމަންޓް އެންޑް އެނަރޖީން ދިވެހިރާއްޖޭގައި އެނަރޖީ އެފިޝެންސީ އާމެދު ހޭލުންތެރިކަން ހުރި މިންވަރު ދެނެގަތުމަށް ކުރި ދިރާސާގެ ހޯދުންތައް ހިއްސާކުރެއްވުމަށް ޝީ ބިލްޑިންގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ. ސްޓޭޓް މިނިސްޓަރ ވިދާޅުވީ އާއްމުން ހޭލުންތެރި ކުރުވުމުގެ އިތުރަށް އިންފްރާސްޓަކްޗަރ ރަނގަޅުކުރުމުގެ މަސައްކަތްވެސް ކުރިއަށްދާ ކަމަށެވެ. އެނަރޖީ އެފިޝެންސީ ދާއިރާގައި ސަރުކާރުން މިހާތަނަށް ކުރައްވާފައިވާ މަސައްކަތްތަކުގެ ތެރެއިން އެންމެ ފާހަގަކޮށްލެވެނީ، "ފަހިއަލި ޕްރޮގްރާމް" އެވެ. ސަރުކާރުން މި ޕްރޮގްރާމް ކުރިއަށްގެންގޮސްފައިވަނީ ޗައިނާ ސަރުކާރުގެ އެހީތެރިކަމާއިއެކުގައެވެ. މި ޕްރޮގްރާމްގެ ދަށުން ވަނީ ލެޑް ސޭވް ލައިޓް ރާއްޖޭގެ އެކި ކަންކޮޅުތަކަށް ބަހާފައެވެ. އަދި މި ޕްރޮގްރާމްގެ ނަތީޖާ ވަރަށް ރަނގަޅަށް މިހާރު ފެންނަމުންދާކަމަށްވެސް މަތީން ވިދާޅުވިއެވެ.
މިނިސްޓްރީ އޮފް އެންވަޔަރަމަންޓް އެންޑް އެނަރޖީން ދިވެހިރާއްޖޭގައި އެނަރޖީ އެފިޝެންސީ އާމެދު ހޭލުންތެރިކަން ހުރި މިންވަރު ދެނެގަތުމަށްޓަކައި ކުރި ދިރާސާގެ ހޯދުންތައް ވަނީ ކަމާގުޅުންހުރި ފަރާތްތަކާ ހިއްސާކުރައްވާފައެވެ. މި ދިރާސާއަކީ ތިމާވެއްޓާ ބެހޭ ވުޒާރާގެ ފަރާތުން ރަޔާން ޕްރައިވެޓް ލިމިޓެޑާ ޙަވާލުކުރައްވައިގެން ތައްޔާރުކުރި ދިރާސާއެކެވެ. މި ދރާސާގެ މަޤްސަދަކީ ރާއްޖޭގައި ހަކަތަ އެފިޝެންސީ (ސަމަކާރަ) އާއިބެހޭގޮތުން އާއްމުން ހޭލުންތެރިކަން ހުރި މިންވަރާއި، ގޭބިސީތަކުން ކަރަންޓް ބޭނުންކުރާ މިންވަރާއި ހަކަތަ ސަމަކާރަގޮތުގައި ބޭނުންކުރުމުގައި ހުރި ދަތިތައް ދެނެގަތުމެވެ. އަދި ކަރަންޓް ސާމާނު ގަތުމުގައި އާންމުންގެ ވިސްނުން ހުންނަގޮތުގެ މައުލޫމާތު ދެނެގަތުމެވެ. މި ދިރާސާގައި މާލެ ސަރަޙައްދު ހިމެނޭގޮތަށް ޖުމްލަ ހަ ސަރަޙައްދަކުން 1،894 ގޭބިސީއަކުން މައުލޫމާތު ނަގާފައިވެއެވެ. މި ދިރާސާ ކުރިއަށްގެންގޮސްފައިވަނީ، މިނިސްޓްރީ އޮފް އެންވަޔަރަމަންޓް އެންޑް އެނަރޖީ އާއި އދ. ގެ ތިމާވެއްޓާ ބެހޭ ޖަމިއްޔާ ޔުނައިޓެޑް ނޭޝަންސް އެންވަޔަރަމަންޓް ޕްރޮގްރާމް (ޔުނެޕް) ގުޅިގެން ގްލޯބަލް އެންވަޔަރަމަންޓް ފެސިލިޓީ (ޖީއީއެފް) ގެ އެހީގައެވެ.