ސަރުކާރާއި ދިވެހި ރައްޔިތުން ޙިއްޞާވާ ވިޔަފާރި ކުންފުނި، އެސްޓީއޯގެ ހުސްވި އަހަރުގެ އަހަރީ ޢާއްމު ޖަލްސާ މިމަހުގެ 30 ވަނަ ދުވަހުގެ ރޭ ބޭއްވުމަށް ތާވަލްކޮށްފިއެވެ.
ޙިއްޞާދާރުންގެ މަޢުލޫމާތަށްޓަކައި އެސްޓީއޯއިން ނެރެފައިވާ އަހަރީ ޢާއްމުޖަލްސާގެ ނޯޓިސްގައި ބުނެފައިވަނީ، 2016 ވަނަ އަހަރުގެ އަހަރީ ޢާއްމުޖަލްސާ މިމަހުގެ 30 ވަނަ ދުވަހުގެ ރޭ 22:00 ގައި ދަރުބާރުގޭ ރަންނަބަނޑޭރި މާލަމުގައި ބޭއްވުމަށް ހަމަޖެހިފައިވާ ކަމަށެވެ. މި ޖަލްސާގައި ޑިރެކްޓަރުންގެ ބޯޑުން ޙިއްޞާދާރުންނަށް ބަހަން ހުށައެޅި ޙިއްޞާގެ ފައިދާ ފާސްކުރުން އޮންނާނެއެވެ. އަދި ކުރިއަށް އޮތް ދައުރަށް ކުންފުނީގެ ބޯޑަށް ޑިރެކްޓަރުން ޢައްޔަނުކުރުން އޮންނާނެއެވެ. މީގެ އިތުރަށް ކުންފުނީގެ ޢާއްމު ޙިއްޞާދާރުންގެ ޚިޔާލު ފާޅުކުރުންވެސް މިޖަލްސާގައި އޮންނާނެއެވެ.
އެސްޓީއޯއަށް މިދިޔަ އަހަރު ސާފުފައިދާގެ ގޮތުގައި 300 މިލިއަނަށްވުރެ ގިނަ ރުފިޔާ ލިބިފައިވެއެވެ. އެސްޓީއޯގެ ހުސްވިއަހަރުގެ ވިޔަފާރީގެ ފައިދާއިން ޙިއްޞާއަކަށް 51 ރުފިޔާ ބެހުމަށް އެކުންފުނީގެ ޑިރެކްޓަރުންގެ ބޯޑުން ނިންމާފައިވާއިރު، 2015 ވަނަ އަހަރު ޙިއްޞާގެ ފައިދާގެ ގޮތުގައި ބަހާފައިވަނީ ޙިއްޞާއަކަށް 57 ރުފިޔާއެވެ.