އެސްޓީއޯއިން ހުޅުމާލޭގައި ތަރައްޤީކުރަމުން އަންނަ ހޮޓާ، ބަޔަކާއި ގުޅިގެން ހިންގުމަށް ނިންމައި އަންނަ އަހަރު އެ ހޮޓާ ހުޅުވުމަށް ނިންމައިފިއެވެ.
އެސްޓީއޯގެ ހުސްވިއަހަރުގެ އަހަރީ އާއްމުޖަލްސާގައި އާއްމު ހިއްސާދާރަކު ކުރި ސުވާލަކަށް ޖަވާބުދެއްވަމުން، އެސްޓީއޯގެ މެނޭޖިންގ ޑިރެކްޓަރު އަހުމަދު ޝަހީރު ވިދާޅުވީ، ހުޅުމާލޭގައި އެސްޓީއޯއިން ތަރައްޤީ ކުރަމުންދާ ހޮޓާ ވިއްކާލުމަށް މަސައްކަތްތަކެއް ކުރިއަށްގެންދިޔަ ނަމަވެސް މިހާރު ހޮޓާ ވިއްކާލުމުގެ ބަދަލުގައި ޖޮއިންޓް ވެންޗަރ އުސޫލުން ހޮޓާ ހިންގުމުގެ މަސައްކަތް ކުރިއަށް ގެންދިއުމަށް ނިންމާފައިވާ ކަމަށެވެ. މިގޮތަށް ނިންމީ ސަރުކާރުގެ ކަމާއިބެހޭ ފަރާތްތަކާއި މަޝްވަރާ ކުރެއްވުމަށްފަހު ކަމަށް ޝަހީރު ވިދާޅުވިއެވެ.
އެސްޓީއޯއިން ހުޅުމާލޭގައި ތަރައްޤީކުރަމުންދާ 250 އެނދުގެ މި ހޮޓަލުގެ މަސައްކަތް ފަށާފައިވަނީ 2012 ވަނަ އަހަރެވެ. މި ހޮޓަލަކީ 500 މިލިއަނަށްވުރެ ގިނަ ރުފިޔާ ޚަރަދުކޮށްގެން ތަރައްޤީކުރާ ހޮޓަލެކެވެ. އެސްޓީއޯއިން މި ހޮޓަލުގެ މަސައްކަތް ކުރިއަށްގެންދަނީ، ތައިލެންޑްގެ އެކްސްއިމް ބޭންކުން 32 މިލިއަން ޑޮލަރުގެ ލޯނެއް ނަގައިގެންނެވެ. އެސްޓީއޯއިން މީގެ ކުރިން ހޮޓާ ހިންގުމަށް ނިންމާފައިވަނީ، އެމެރިކާގެ ކާލްސަން ގުރޫޕާ ޙަވާލުކޮށްގެންނެވެ.
އެސްޓީއޯއިން މައުލޫމާތުދޭ ގޮތުގައި ހުޅުމާލޭގައި ތަރައްޤީކުރަމުންދާ ހޮޓަލުގެ މަސައްކަތް ނިމި އެތަން ހިންގަން ފެށުމުން އެސްޓީއޯގެ ވިޔަފާރިއަށް ބޭނުންވާ ބޭރުފައިސާ ހޯދުމުގައި ވަރަށްބޮޑު ލުއިފަސޭހަކަމެއް ލިބިގެންދާނެއެވެ.