އިންޓަރނޭޝަނަލް ފްރެންޗައިޒް ބްރޭންޑެއްކަމަށްވާ "މޫވެން ޕިކް"ގެ އައުޓްލެޓެއް މާލޭގައި ހުޅުވައިފިއެވެ.
ދިވެހިންގެ މެދުގައިވެސް ބޮޑު މަޤްބޫލުކަމެއް ލިބިފައިވާ މަޝްހޫރު އައިސްކްރީމް ބްރޭންޑެއް ކަމަށްވާ، މޫވެން ޕިކްގެ އައުޓްލެޓެއް ހުޅުވާފައިވަނީ އަބަދަށްފެހިމަގު، ހެންވޭރު ހިރިޔާގޭގައެވެ. މޫވެން ޕިކްގެ މި އައުޓްލެޓް ހުޅުވާފައިވަނީ ވީއެޗް ހޯލްޑިންގްސް ޕްރައިވެޓް ލިމިޓެޑުންނެވެ.
ނޫސްވެރިންނަށް މަޢުލޫމާތުދެއްވަމުން، ވީއެޗް ހޯލްޑިންގްސްގެ މެނޭޖަރ މާކެޓިންގ އެންޑް ސޭލްސް އަޙުމަދު ޔޫމާން ސަޢީދު ވިދާޅުވީ، މޫވެން ޕިކް އައިސްކްރީމަށް ޙާއްޞަ މި ރެސްޓޯރެންޓުން، މޫވެން ޕިކްގެ އައިސްކްރީމްގެ ގިނަ ރަހަތައް ލިބެންހުންނާނޭކަމަށެވެ.
މޫވެން ޕިކްގެ އައުޓްލެޓް ހުޅުވުމަށް ބޭއްވި ހަފްލާގައި، މޯލްޑިވިއަން އައިޑަލްގެ ބައެއް ތަރިންވެސް ބައިވެރިވެފައިވެއެވެ. އަދި މި ހަފްލާގައި މޯލްޑިވިއަން އައިޑަލްގެ ބައެއް ތަރިން ހުށަހެޅުންތައްވެސް ހުށަހަޅައިދީފައިވެއެވެ.
މޫވެން ޕިކްއަކީ ސްވިޒަރލެންޑްގެ ބްރޭންޑެއް "ދި އާރޓް އޮފް ސްވިސް އައިސްކްރީމް" ގެ ނަމުން މަޝްހޫރުވެފައިވާ މި ބްރޭންޑްގެ އައުޓްލެޓްތައް ދުނިޔޭގެ ތިރީހަށްވުރެ ގިނަ ޤައުމުތަކުގައި ހުރެއެވެ. މޫވެން ޕިކް އުފައްދާފައިވަނީ، 1948 ވަނަ އަހަރުގައެވެ.