ބާޒާރުގައި މޭވާ އާއި ތަރުކާރީގެ ބާވަތްތަކުގެ އަގުތައް ބޮޑުވަމުންދަނީ މާލޭ ވިޔަފާރި ބަނދަރުން މުދާ ބޭރުކުރުން ލަސްވެގެންކަމަށް ޤަބޫލު ނުކުރައްވާކަމަށް އެމްޕީއެލްގެ ސީއީއޯ އިބްރާހިމް އަބްދުއް ރައްޒާގު ހަލީމް ވިދާޅުވެއްޖެއެވެ.
ޕީއެސްއެމްނިއުސްއަށް ދެއްވި ބަސްދީގަތުމެއްގައި، މޯލްޑިވްސް ޕޯޓްސް ލިމިޓެޑްގެ ސީއީއޯ އިބްރާހިމް އަބުދުލް ރައްޒާޤް ހަލީމް ވިދާޅުވީ، ރޯދަމަހަށް ގެންނަ މުދާ ކްލިއަރ ކުރުމުގައި ޚާއްޞަ އުޞޫލްތަކެއް ހަމަޖައްސާފައިވާ ކަމަށެވެ. ނަތީޖާއެއްގެ ގޮތުން މުދާ ކްލިއަރ ކުމުގެ ސްޕީޑް އަވަސްވެފައިވާ ކަމަށް އޭނާ ވިދާޅުވިއެވެ. އެގޮތުން މިހާރު 24 ގަޑިއިރުގެ ތެރޭގައި އަވަހަށް ހަލާކުވާ ޒާތުގެ ކާބޯތަކެތި ކުލިއަރކޮށް ނިމޭކަމަށް އިބްރާހިމް އަބުދުލް ރައްޒާގް ވިދާޅުވިއެވެ. އެހެންކަމުން އެމްޕީއެލުން މުދާ ނުނެރެވިގެން މުދާ ހަލާކުވާ މައްސަލައަށް މިހާރު ޙައްލެއް ލިބިފައިވާކަމަށް ރައްޒާގް ވިދާޅުވިއެވެ.
ރޯދަމަހަށް ޙާއްޞަކޮށް ރާއްޖެ ގެންނަ ތަރުކާރީ އާއި މޭވާގެ ބާވަތްތައް ކްލިއަރ ކުރުމަށް އެމްޕީއެލްގެ މުއައްޒަފުން ގެންދަނީ 24 ގަޑިއިރު މަސައްކަތް ކުރަމުންނެވެ.