ރ. އަތޮޅުގައި ތަރައްޤީކުރި ދިގަލި ރިސޯޓް ހުޅުވައިފި

ކޮރަލް އެޖް ޕްރައިވެޓް ލިމިޓެޑުން ރ. އަތޮޅުގައި ތަރައްޤީކުރި ދިގަލި ރިސޯޓް ހުޅުވައިފިއެވެ.

ސައްތައިން ސައްތަ ދިވެހި ކުންފުންޏެއް ކަމަށްވާ، ކޮރަލް އެޖްއިން ރ. އަތޮޅުގައި ތަރައްޤީކުރި ދިގަލި މޯލްޑިވްސުން ވަނީ ޖޫންމަހުގެ އެއްވަނަ ދުވަހު އެ ރިސޯޓަށް ޒިޔާރަތްކުރި ފުރަތަމަ ފަތުރުވެރިޔާއަށް މަރުޙަބާ ކިޔާފައެވެ.

މޫދަށްޖައްސާ ބޯޓެއްގައި ވެލާނާ އިންޓަރނޭޝަނަލް އެއަރޕޯޓުން ފުރައިގެން ދިގައްޔަށް ފަތުރުވެރިޔާ ދިއުމަށް ހޭދަވީ 45 މިނެޓެވެ. ރ. އަތޮޅު މީދޫ ކައިރީގައި އޮންނަ ދިގަލި ރިސޯޓަކީ 18.5 ހެކްޓަރުގެ ބޮޑު ރަށެކެވެ. ދިގަލި ރިސޯޓަކީ 180 ކޮޓަރީގެ ރިސޯޓެކެވެ. މި ރިސޯޓްގައި 20 ބީޗް ބަނގަލޯ އަދި 63 ބީޗް ވިލާ ހިމެނެއެވެ.

މި ރިސޯޓްގައި 5 ރެސްޓޯރެންޓް ހުންނައިރު، މި ރެސްޓޯރެންޓްތަކުން އޭޝިއާ، ޔޫރަޕް އަދި ދިވެހި ރަހަތައް ތަޖުރިބާކޮށްލެވޭނެއެވެ. ދިގަލި ރިސޯޓަށް ޒިޔާރަތްކުރާ ފަތުރުވެރިންނަށް، ރާއްޖޭގައި ޔުނެސްކޯއިން ކަނޑައަޅާފައިވާ ބަޔޮސްފިއާ ރިޒާވް ސަރަޙައްދުގައިވާ ހަނިފަރު ބޭއަށް ޑައިވިނަށްގޮސް، އެތަނުގެ ކަނޑުއަޑީގެ ޤުދުރަތީ ރީތިކަން ބަލާލުމުގެ ފުރުޞަތު ލިބިގެންދާނޭ ކަމަށް ކޮރަލް އެޖް ޕްރައިވެޓް ލިމިޓެޑުން ބުނެއެވެ. ކޮރަލް އެޖް ޕްރައިވެޓް ލިމިޓެޑުން ރ. އަތޮޅުގައި ތަރައްޤީކުރި ދިގަލި ރިސޯޓް ހުޅުވާފައިވާއިރު، މާރކެޓަށް އިތުރު ރިސޯޓްތައް ނެރުއްވުމަށް ސަރުކާރުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ.

ސަރުކާރުގެ އަމާޒަކީ އަހަރަކު މަދުވެގެން 10 ރިސޯޓް މާކެޓަށް ނެރުއްވުމެވެ. މިގޮތުން މިދިޔަ އަހަރުވެސް 11 ރިސޯޓް މާރކެޓަށް ނެރުއްވާފައިވާ ކަމަށް ޓޫރިޒަމް މިނިސްޓްރީން ވިދާޅުވެއެވެ.