ދ.ކުޑަހުވަދޫ އެއަރޕޯޓަށް މޯލްޑިވިއަންގެ ޝެޑިއުލް ދަތުރުތައް މިއަދު ފަށައިފިއެވެ.
ޝެޑިއުލް ދަތުރުތައް ފަށާފައިވަނީ، މިއަދު މެންދުރު އެއްގަޑި ފަންސާހުގައެވެ. ވެލާނާ އިންޓަނޭޝަނަލް އެއަރޕޯޓާއި ދާލު އެއަރޕޯޓާއި ދެމެދު ދަތުރެއްގެ ދިގުމިނަކީ، 30 މިނެޓެވެ. ޕީއެސްއެމް ނިއުސްއަށް މަޢުލޫމާތުދެމުން ރާއްޖޭގެ ޤައުމީ އެއަރލައިން މޯލްޑިވިއަންގެ މެނޭޖިން ޑިރެކްޓަރ ޢަބްދުލްހާރިސް ވިދާޅުވީ، ބުދަ ދުވަހުން ފެށިގެން ވެލާނާ އިންޓަނޭޝަނަލް އެއަރޕޯޓުން ދާލު އެއާރޕޯޓަށް ދުވާލަކު އެއް ފްލައިޓް ދަތުރުކުރާނެކަމަށެވެ. ޑިމާންޑަށް ބެލުމަށްފަހު، މިއަހަރު ނިމުމުގެ ކުރިން ފްލައިޓްތަކުގެ ޢަދަދު ތިނަކަށް އިތުރުކުރާނެކަމަށްވެސް ހާރިސް ވިދާޅުވިއެވެ.
މޯލްޑިވިއަނުން ދ.ކުޑަހުވަދޫ އެއަރޕޯޓަށް ފެށި ދަތުރުތަކާއި ގުޅޭގޮތުން އިތުރަށް ވާހަކަދައްކަވަމުން ހާރިސް ވިދާޅުވީ، ފުރަތަމަ ފްލައިޓްވެސް ފުލް ވެފައިވާކަމަށެވެ. މޯލްޑިވިއަންގެ ދަތުރުތައް ދާލު އެއާރޕޯޓަށް ފެށުމުން، އެ ސަރަޙައްދުގެ ރަށްރަށުގައި ދިރިއުޅޭ ރައްޔިތުންނަށް ވަރަށް ބޮޑު ލުއިފަސޭހަތަކެއް ލިބިގެންދާނެކަމަށާއި، ޚާއްސަ ގޮތެއްގައި ވިޔަފާރިވެރިންނަށް ފަސޭހަވެ، ވިޔަފާރިތައް ކުރިއަރައިގެން ދާނެކަންވެސް ހާރިސް ފާހަގަކުރެއްވިއެވެ.
މޯލްޑިވިއަނުން ކުޑަހުވަދުއަށް ދިއުމަށް އެއްކޮޅު ޓިކެޓްގެ އަގަކީ، 888 ރުފިޔާއެވެ. ކުޑަހުވަދޫ އެއަރޕޯޓުގެ މަޝްރޫޢަށް ގާތްގަނޑަކަށް ވިހި މިލިއަން ޑޮލަރު ޚަރަދުކޮށްފައިވާއިރު، މި އެއަރޕޯޓް ތަރައްޤީކޮށްފައިވަނީ އެރަށުގެ ފަޅުން ގާތްގަނޑަކަށް 62 ހެކްޓަރުގެ ބިން ހިއްކައިގެންނެވެ. އެއްހާސް އަށްސަތޭކަ މީޓަރުގެ ރަންވޭއަކާއެކު ކުޑަހުވަދޫ އެއަރޕޯޓް ތަރައްޤީކޮށްފައިވަނީ، ޕްރައިވެޓް ޖެޓް ޕާކިންގ އޭރިއާއަކާއެކުގައެވެ.