ސިންގަޕޫރުގެ މަޝްހޫރު ބްރޭންޑެއް ކަމަށްވާ "ޓެކްނޯ" ބްރޭންޑްގެ އުފެއްދުންތައް، އެސްޓީއޯއިން ރާއްޖޭގެ ބާޒާރަށް ތަޢާރަފްކޮށްފިއެވެ.
އެސްޓީއޯއިން ރާއްޖޭގެ ބާޒާރަށް ތަޢާރަފްކުރި "ޓެކްނޯ" ބްރޭންޑްގެ އުފެއްދުންތަކުގެ ތެރޭގައި ހިމެނެނީ، ރިސޯޓް އަދި ގޭތެރޭގެ އެކި ބޭނުންތަކުގައި ބޭނުންކުރާ ސާމާނެވެ. "ޓެކްނޯ" ބްރޭންޑްގެ މި އުފެއްދުންތަކާއި ބެހޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން އެސްޓީއޯގެ ސީނިއަރ ބްރޭންޑް މެނޭޖަރ އާމިނަތު ޝުރުފާ ވިދާޅުވީ، އަލަށް ތަޢާރަފްކުރި ޓެކްނޯ ބްރޭންޑްގެ އުފެއްދުންތަކާއިއެކު، ގޭތެރެއަށް އަދި ބަދިގެއަށް ބޭނުންވާ ކޮލިޓީ ޕްރޮޑަކްޓްސް ހެޔޮއަގެއްގައި އެސްޓީއޯ ހޯމް އިމްޕްރޫވްމަންޓުން ލިބެން ހުންނާނޭކަމަށެވެ.
img:http://s1.psmnews.mv/images/660x400/14989859508486.jpg|ޓެކްނޯ ބްރޭންޑްގެ އުފެއްދުންތަކެއް / އެސްޓީއޯއިން ޓެކްނޯގެ އުފެއްދުންތައް މިހާރު ލިބޭނެ
މީގެތެރޭގައި އުދުން، އަވަން، ހުޑް، ދޮންނަ މެޝިން، ޑިޝްވޮޝަރ، ކޫލަރ، ފްރީޒަރ އަދި ޝަވަރ ހީޓަރ ހިމެނެއެވެ. ޝުރުފާ ވިދާޅުވީ "ޓެކްނޯ"ގެ އުފެއްދުންތައް ރާއްޖޭގެ ބާޒާރަށް ތަޢާރަފްކުރީ ދިރާސާތަކެއް ކޮށްފައިކަމަށާއި، "ޓެކްނޯ" އަކީ ސިންގަޕޫރުގައި ބޮޑެތި ގިނަ ކުންފުނިތަކާއިއެކު މަސައްކަތްކޮށްފައިވާ އަދި މިހާރުވެސް ކުރަމުންގެންދާ ބްރޭންޑެއްކަމަށެވެ.
އެސްޓީއޯއިން ވަނީ ކުރިއަށްއޮތް ތަނުގައި މިބްރޭންޑްގެ އިތުރު އުފެއްދުންތައް ރާއްޖޭގެ ބާޒާރަށް ތަޢާރަފްކުރުމަށް ނިންމާފައެވެ. "ޓެކްނޯ" ބްރޭންޑް ތަޢާރަފްކުރުމާއި ގުޅިގެން އެސްޓީއޯ ހޯމް އިމްޕްރޫވްމަންޓުން ވަނީ ޓެކްނޯއަށް ޚާއްސަކޮށްގެން އީދު އޮފާރގެ ނަމުގައި ޕްރޮމޯޝަނެއް ފަށާފައެވެ. މިޕްރޮމޯޝަންގައި ޓެކްނޯގެ ހުރިހާ މުދަލަކުން ދިހައެއް އިންސައްތައާ ހަމައަށް ޑިސްކައުންޓް ލިބޭނޭކަމަށް އެސްޓީއޯއިން ބުނެއެވެ. އެސްޓީއޯއިން ބުނީ، ކުރިއަށްއޮތް ތަނުގައި އެސްޓީއޯގެ އަތޮޅުތެރޭގެ ފިހާރަތަކުންވެސް ޓެކްނޯގެ އުފެއްދުންތައް ވިއްކާނެކަމަށެވެ.