އެމްއެމްއޭއިން އިންތިޒާމްކޮށްގެން މިމަހުގެ 6 ވަނަ ދުވަހު ފެށި މޯލްޑިވްސް ފައިނޭންޝަލް އެކްސްޕޯ ކާމިޔާބުކަމާއިއެކު ނިންމާލައިފިއެވެ.
މޯލްޑިވްސް ފައިނޭންޝަލް އެކްސްޕޯ ދެހާސް ސަތާރަ ނިމުނުއިރު މިފަހަރުގެ ފެއާ ވަރަށް ކާމިޔާބުކަމަށް އެމްއެމްއޭއިން ބުނެއެވެ. އެމްއެމްއޭއިން ބުނީ މިފަހަރުގެ އެކްސްޕޯއަށް ހަ ހާހަށްވުރެ ގިނަ މީހުން ޒިޔާރަތްކުރިކަމަށެވެ. މޯލްޑިވްސް ފައިނޭންޝަލް އެކްސްޕޯ ދެހާސް ސަތާރައާއި ބެހޭގޮތުން އެމްއެމްއޭގެ ގަވަރުނަރު ޑރ އަޒީމާ އާދަމް ވިދާޅުވީ، އެކްސްޕޯއަށް ޒިޔާރަތްކުރި މީހުންގެ އަދަދާއި، އެކްސްޕޯގައި ކުރިއަށްދިޔަ ވިޔަފާރީގެ އެކިއެކި މުއާމަލާތްތަކަށް ބަލާއިރު، މިފަހަރުގެ އެކްސްޕޯއަކީ ވަރަށް ކާމިޔާބު އެކްސްޕޯއެއްކަމަށެވެ.
ފައިނޭންޝަލް އެކްސްޕޯގައި ބައިވެރިވި ކުންފުނިތަކުން ވަނީ ސްޓޯލްތަކަށް ޒިޔާރަތްކުރި ފަރާތްތަކަށް އެކުންފުންޏަކުން ދޭ ޚިދުމަތްތަކާއި ބެހޭ މައުލޫމާތުތައް ދީފައެވެ. މިގޮތުން ބައެއް ކުންފުނިތަކުން ވަނީ، ބައެއް ހިދުމަތްތަކުގެ އެޕްލިކޭޝަން ފޯމް ބަލައިގަތުމުގެ ކަންކަން ކުރިއަށްގެންގޮސްފައެވެ. މީގެ އިތުރުން އެކްސްޕޯގައި ބައިވެރިވި ކުންފުނިތަކުން ވަނީ އެފަރާތްތަކުގެ އާ އުފެއްދުންތައްވެސް އެކްސްޕޯގައި ތައާރަފްކޮށްފައެވެ.
މިގޮތުން ސްޓޭޓް ބޭންކް އޮފް އިންޑިއާ ދިވެހިރާއްޖޭގެ ގޮފިން ވަނީ މޯބައިލް ބޭންކިންގެ ޚިދުމަތް ތައާރަފްކޮށްފައެވެ. އަދި ބޭންކް އޮފް ސިލޯނުން ވަނީ ހައުސިން ލޯނެއް ތައާރަފްކޮށްފައެވެ. މީގެ އިތުރުންވެސް ފެއާގައި ބައިވެރިވި ރިއަލް ސްޓޭޓް ވިޔަފާރިތަކުން ވަނީ ބައެއް މަޝްރޫއުތައް ތައާރަފްކޮށްފައެވެ.
އެމްއެމްއޭއިން މޯލްޑިވްސް ފައިނޭންޝަލް އެކްސްޕޯ ދެހާސް ސަތާރަ ކުރިއަށް ގެންގޮސްފައިވަނީ އެޗްޑީސީއާ ގުޅިގެނެވެ. މިފަހަރުގެ އެކްސްޕޯގެ ތީމަކީ، "ހައުސިން އެންޑް ފައިނޭންސް"އެވެ.
މިއަހަރުގެ އެކްސްޕޯގައި ރާއްޖޭގައި ޚިދުމަތްދޭ ހުރިހާ ބޭންކުތަކާއި، އިންޝުއަރެންސް ކުންފުނިތަކުން ވަނީ ބައިވެރިވެފައެވެ. މީގެ އިތުރުން، ރިއަލް އެސްޓޭޓް ޑިވެލޮޕަރސް އާއި ކޮންޓްރެކްޓަރުން އަދި އާކިޓެކްޓުންނާއި އިންޓީރިއާރ ޑިޒައިނަރުންނާ އެކު ޖުމްލަ ތިރީހަށް އަށް ވުރެ ގިނަ އެގްޒިބިޓަރުން ވަނީ ބައިވެރިވެފައެވެ.
އެމްއެމްއޭއިން ބުނީ، މޯލްޑިވްސް ފައިނޭންޝަލް އެކްސްޕޯ ބޭއްވުމުގެ މައިގަނޑު މަޤްސަދަކީ، ޢާންމުންގެ މެދުގައި މާލީ އަދި އިޤްތިޞާދީ ކަންކަމާ ބެހޭގޮތުން ހޭލުންތެރިކަން އިތުރުކުރުމެވެ. މީގެ އިތުރުން އާންމުންނާއި މާލީ އިދާރާތަކުގެ ގުޅުން ބަދަހިކުރުން ހިމެނެއެވެ.
މޯލްޑިވްސް ފައިނޭންޝަލް އެކްސްޕޯގައި ގެދޮރު ގަތުމަށާއި އަމިއްލަ ފަރާތްތަކުން ބިންތައް އިމާރާތް ކުރުމަށް ހުރި ފުރުސަތުތަކާއި، މާލީ އިދާރާތަކުން އެކަމަށް ފައިނޭންސް ހޯދޭނެ ގޮތްތަކާ ބެހޭ މައުލޫމާތު އެކްސްޕޯއަށް ޒިޔާރަތްކުރި މީހުނަށް ވަނީ ދީފައެވެ.
މިއީ މޯލްޑިވްސް ފައިނޭންޝަލް އެކްސްޕޯގެ ނަމުގައި އެމްއެމްއޭއިން އެކްސްޕޯ ބޭއްވި ދެވަނަ ފަހަރެވެ. އެމްއެމްއޭއިން އެންމެ ފުރަތަމަ މޯލްޑިވްސް ފައިނޭންޝަލް އެކްސްޕޯ ބާއްވާފައިވަނީ ދެހާސް ފަނަރަވަނަ އަހަރުއެވެ.