ގެދޮރުގެ ދަތިކަން ހުރި ފަރާތްތަކަށް ހާއްސަ ލޯނު ސްކީމެއް ތައާރަފްކުރުމަށް އެމްއެމްއޭއިން ނިންމައިފިއެވެ.
މޯލްޑިވްސް މަނިޓަރީ އޮތޯރިޓީ، އެމްއެމްއޭއިން މިގޮތަށް ހާމަކޮށްފައިވަނީ، މިއަދު ބޭއްވި ނޫސްވެރިންގެ ބައްދަލުވުމެއްގައެވެ. އެމްއެމްއޭގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ގަވަރުނަރު ޑރ އަޒީމާ އާދަމް ވިދާޅުވީ، ގެދޮރުގެ ދަތިކަން ހުރި ފަރާތްތަކަށް ހާއްސަކޮށްފައިވާ މި ލޯނު ސްކީމް ތައާރަފްކުރާނީ އަންނަ އޮގަސްޓްމަހުކަމަށެވެ. މި ސްކީމް ބަހާލާފައިވަނީ ތިން އަހަރުދުވަހަށެވެ.
ރާއްޖޭގެ ބާޒާރުގައި ހައުސިންއަށް ދޫކުރާ ލޯނުތަކުގެ އިންޓަރަސްޓް ރޭޓް ބާރަ އިންސައްތައިގަ ހުރިނަމަވެސް، އެމްއެމްއޭއިން ތައާރަފްކުރުމަށް ހަމަޖެހިފައިވާ ސްކީމްގެ ދަށުން ދޫކުރާ ލޯނުގެ އިންޓަރަސްޓް ރޭޓަކީ ފަހެއް އިންސައްތައާ ހައެއް އިންސައްތައާ ދެމެދުގެ އަދަދެކެވެ.
ގަވަރުނަރު ޑރ އަޒީމާ އާދަމް ވިދާޅުވީ، މާލީ ދާއިރާ ތަރައްޤީކޮށް ކުރިއެރުވުމުގެ އިތުރަށް، މަދުން އާމްދަނީ ލިބޭ ފަރާތްތަކަށް އެކަށީގެންވާ އަގެއްގައި ލޯނު ހޯދައިދިނުމަކީ އެމްއެމްއޭއިން ހާއްސަ އިސްކަމެއްދެއްވާ ކަމެއްކަމަށެވެ.
ނޫސްވެރިންގެ މި ބައްދަލުވުމުގައި ވާހަކަދައްކަވަމުން ހައުސިންގ މިނިސްޓަރު ޑރ މުހަންމަދު މުއިއްޒު ވިދާޅުވީ، އޮގަސްޓްމަހު ތައާރަފްކުރުމަށް ހަމަޖެހިފައިވާ ލޯނު ސްކީމުން ފުރަތަމަ އިސްކަން ދޭނީ މާލޭގައި ތަރައްޤީކޮށް ނިމިފައިހުރި ގާކޮށި، އަދި އަރަބިއްޔާ ފްލެޓްތައް ލިބިފައިހުރި ފަރާތްތަކަށްކަމަށެވެ. ނަމަވެސް ކުރިއަށްއޮތްތަނުގައި މި ސްކީމް މުޅި ރާއްޖެއަށް ހުޅުވާލާނޭކަމަށް މިނިސްޓަރު މުއިއްޒު ވިދާޅުވިއެވެ.
އަލަށް ތައާރަފްކުރުމަށް ހަމަޖެހިފައިވާ ސްކީމުން ލޯނު ދޫކުރުމަށް ހަމަޖެހިފައިވަނީ، ދޭއް ޕޮއިންޓް ދޭއް މިލިއަން ރުފިޔާއަށްވުރެ ދަށް އަގެއްގައި ވިއްކުމަށް ނިންމާ ފްލެޓް ގަތުމަށާއި، އަމިއްލަ ދިރިއުޅުމަށް މިއަގުގައި އަމިއްލަ ގެދޮރު އިމާރާތްކުރުމަށްކަމަށެވެ. އެމްއެމްއޭއިން ވަނީ ކުރިއަށްއޮތްތަނުގައި ބޭންކްތަކުން ދޫކުރާ ލޯނުތަކުގެ ޖުމްލަ ފައިސާގެ ތެރެއިން މަދުވެގެން ދިހައެއް އިންސައްތަ، ގެދޮރުގެ ދަތިކަން ހުރި ފަރާތްތަކަށް ހާއްސަކުރުމަށް ބޭންކްތަކަށް އަންގާފައެވެ. ނަމަވެސް މިކަމަށް އަދި ވަގުތު ބޭނުންވާނޭކަމަށް އެމްއެމްއޭއިން ބުނެއެވެ.