މިހިނގާ ޖުލައިމަހުގެ ތެރޭގައި ބޭނުންކުރުމަށް ތައްޔާރުވަމުންދާ ރަންދިހަ ފަހެއް ނޫޓު ސީރީޒްގެ 5 ރުފިޔާގެ ނޫޓު ޗާޕުކޮށްގެން ރާއްޖެ ގެނެސްފައިވާކަމަށް މަރުކަޒީ ބޭންކުން ހާމަކޮށްފިއެވެ.
މިކަމާ ބެހޭގޮތުން މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީން ބުނީ، ރަންދިހަފަހެއް ނޫޓް ސީރީޒްގެ 5 ރުފިޔާގެ ނޫޓު ޗާޕުކޮށްގެން ރާއްޖެ ގެނެވި ދައުލަތުގެ ޚަޒާނާގައި ރައްކާކޮށްފައިވާކަމަށެވެ.
މަރުކަޒީ ބޭންކުން ރަންދިހަ ފަހެއް ނޫޓު ސީރީޒްގެ 5 ރުފިޔާގެ ނޫޓު ތައާރަފްކޮށްފައިވަނީ، މިއަހަރުގެ މެއިމަހުގެ 10 ވަނަ ދުވަހުއެވެ. 5 ރުފިޔާގެ މި ނޫޓު ތައާރަފްކޮށްދެއްވީ އިސްކަންދަރު ސްކޫލްގައި ބޭއްވި ރަސްމިއްޔާތެއްގައި އެޑިއުކޭޝަން މިނިސްޓަރު ޑރ އާއިޝަތު ޝިހާމެވެ.
5 ރުފިޔާ ނޫޓަކީ ރަންދިހަ ފަހެއް ސީރީޒްގެ ނޫޓުތަކުގެ ތެރެއިން އެންމެފަހުން ތައާރަފްކުރި ނޫޓެވެ. މި ސީރީޒްގައި ޖުމުލަ 7 ނޫޓު ހިމެނެއެވެ. މި 7 ނޫޓަކީވެސް ކުރިން ބޭނުންކުރަމުންދިޔަ ކަރުދާސް ނޫޓުތަކުގެ ބަދަލުގައި ނެރެފައިވާ ފެންވަރުރަނގަޅު ޕޮލިމާ ނޫޓުތަކެކެވެ.
މަރުކަޒީ ބޭންކުން ރަންދިހަފަހެއް ނޫޓު ސީރީޒް ނެރެފައިވަނީ ދިވެހިރާއްޖޭގެ މިނިވަންކަމަށް ފަންސާސް އަހަރުފުރުނު ރަންޔޫބީލް އާއި ގުޅުވައިގެންނެވެ.