އަންނަ އަހަރުގެ އުމްރާ ދަތުރުތަކަށް ފައިސާ ދެއްކުމުގެ ފުރުޞަތު މޯލްޑިވްސް ޙައްޖު ކޯޕަރޭޝަނުން ހުޅުވާލައިފިއެވެ.
ޙައްޖު ކޯޕަރޭޝަނުން ބުނީ އަންނަ ޖެނުއަރީ މަހުގެ ޢުމްރާ ދަތުރުތަކަށް ރަޖިސްޓްރީކޮށް އަންނަ މަހުގެ އެކާވީހުގެ ކުރިން ފައިސާ ދައްކަންޖެހޭނެކަމަށެވެ. ފަނަރަ ދުވަހުގެ މި ޢުމްރާ ޕެކޭޖަށް ދައްކަންޖެހޭނީ އެކާވީސް ހާސް ނުވަސަތޭކަ ފަސްދޮޅަސް ފަސް ރުފިޔާއެވެ. މީގެ އިތުރުން މާރިޗުމަހުގެ ވީއައިޕީ އުމްރާ ދަތުރުތަކަށް ފައިސާ ދެއްކުމުގެ ފުރުސަތުވެސް ހައްޖު ކޯޕަރޭޝަނުން ވަނީ ހުޅުވާލާފައެވެ. ވީއައިޕީ އުމްރާ ޕެކޭޖްތަކުގެ އަގު އުޅެނީ ސާޅީސް އެއް ހާހުން ފެށިގެން ފަންސާސް ދެ ހާހާއި ދޭތެރޭގެ އަގުތަކެއްގައެވެ.
ޢުމްރާ ދަތުރުތަކަށް ރަޖިސްޓްރީކުރުމަށް އެދި ހުށަހަޅާ ފޯމް ޙައްޖު ކޯޕަރޭޝަންގެ އޮފީހުންނާއި މޯލްޑިވްސް އިސްލާމިކް ބޭންކްގެ ބްރާންޗްތަކުން ބަލައިގަންނާނެކަމަށް ހައްޖު ކޯޕަރޭޝަނުން ބުނެއެވެ. އަދި އެ ކޯޕަރޭޝަންގެ "ފަހެލި" އޮންލައިން ޕޯޓަލް މެދުވެރިކޮށް ފައިސާ ދެއްކޭނެ އިންތިޒާމު ހަމަޖެހިފައިވާކަމަށްވެސް ހައްޖު ކޯޕަރޭޝަނުން ބުނެއެވެ.
ހައްޖު ކޯޕަރޭޝަނުން ބުނީ އުމްރާ ދަތުރަށް ރަޖިސްޓްރީވުމަށް ފޯމާ އެކު މަދުވެގެން ފަސްހާސް ރުފިޔާ ދައްކަންޖެހޭނެކަމަށެވެ. އަދި ބާކީ ފައިސާ ބައި ބަޔަށް ބަހާލައިގެން ދެއްކުމުގެ ފުރުސަތު ހަމަޖެހިފައިވާކަމަށްވެސް ހައްޖު ކޯޕަރޭޝަނުން ބުނެއެވެ.