މިހާރު ބޭނުންކުރަމުން އަންނަ 2 ރުފިޔާގެ ފައިސާ ފޮތީގެ އައު ޝިޕްމަންޓެއް ރާއްޖެ ގެނެސްފިއެވެ.
މޯލްޑިވްސް މަނިޓަރީ އޮތޯރިޓީން ބުނީ 2 ރުފިޔާގެ ފައިސާ ފޮތި އަލުން ޖަހައިގެން 05 ޑިސެންބަރު ގައި ރާއްޖެ ގެނެސް، ދައުލަތުގެ ޚަޒާނާގައި ރައްކާކޮށްފައިވާކަމަށެވެ.
2 ރުފިޔާގެ އައު ފައިސާ ފޮތި ބާޒާރަށް ނެރެފައިވަނީ މިއަހަރުގެ ޖުލައި މަހުގެ 12 ވަނަ ދުވަހުއެވެ. ދެރުފިޔާގެ ލުއި ފައިސާފޮތީގައި ދެމައުދަނެއްވަނީ ބޭނުންކޮށްފައެވެ. އެގޮތުން ބޭރުގައި ބޭނުންކޮށްފައިވަނީ ނިކަލް ބުރާސް އަދި އެތެރޭގައި ބޭނުންކޮށްފައިވަނީ ނިކަލް ޕްލޭޓެޑް ސްޓީލެވެ.
ކުރީގެ ދެރުފިޔާގެ ފައިސާ ފޮއްޗާއި ތަފާތުކޮށް އުފައްދާފައިވާ 2 ރުފިޔާގެ އައު ފައިސާ ފޮއްޗަކީ ބަރުދަނުގެ ގޮތުން ލުއި އެއްޗެކެވެ. އެމްއެމްއޭއިން ބުނީ އަލަށް ނެރުނު ދެރުފިޔާގެ ފައިސާ ފޮއްޗާއި ކުރީގެ ފައިސާ ފޮތިވެސް ސަރކިއުލޭޝަންގައި ދައުރުކުރަމުން ގެންދާނެކަމަށެވެ.