މި ސަރުކާރުން ރާއްޖެއަށް ގެންނަވާފައިވާ އިޤްތިޞާދީ އިންޤިލާބުގެ ހަކަތަ އިތުރުކުރުމަށް ކުރައްވާ މަސައްކަތްތަކުގެ ތެރެއިން ދިވެހި ފިލް އިންޑަސްޓްރީއަށްވެސް ކުރިއެރުންތަކެއް އައިސްފާވާކަމަށް ޔޫތު މިނިސްޓަރ އިރުތިޝާމް އާދަމް ވިދާޅުވެއްޖެއެވެ.
މިނިސްޓަރ މިހެންވިދާޅުވީ 8 ވަނަ ދިވެހި ފިލްމް އެވޯޑް ދިނުމަށް އޮލިމްޕަހުގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ.
ޒުވާނުން ކުރިއެރުވުމާއި ތަރައްޤީއަށް މިސަރުކާރުން ފަށްޓަވާފައިވާ ޤައުމީ މަސައްކަތްތަކުގެ ތެރެއިން ދިވެހި ފަންނާނުން ތަރައްޤީ ކުރުން ހިމެނޭކަން ފާހަގަކޮށް މިނިސްޓަރ އިރުތިޝާމް ވިދާޅުވީ ޒުވާނުންނަކީ ތަފާތު ރޮނގުތަކުން ފަންނުވެރި ޒުވާނުންތަކެއްގެ ގޮތުގައި ހެދުމަށްޓަކައި މި ސަރުކާރުން އަޅާ މުހިއްމު ފިޔަވަޅުތައް ގިނަކަމަށެވެ. އެގޮތުން އެން.ސީ.އޭ ޔޫތް މިނިސްޓްރީގެ ދަށައް ބަދަލުކުރުމަކީ މި އިންޑަސްޓްރީ ކުރިއަރުވަން ސަރުކާރުން އެޅި މުހިއްމު ފިޔަވަޅެއްކަން ފާހަގަކުރެއްވިއެވެ.
ފިލްމީ ތަރިންނަށް އިލްތިމާސްކޮށް ވާހަކަދައްކަވަމުން މިނިސްޓަރ ވިދާޅުވީ ދިވެހި ފިލްމް އިންޑަސްޓްރީއަށް ޤައުމީ ފެންވަރުގަޔާއި ރާއްޖެއިން ބޭރުގައި ބާއްވާ ފިލްމް ފެސްޓިވަލްތަކުން ގިނަ އެވޯޑްތަކެއް ލިބުމަކީ ފިލްމްއިންޑަސްޓްރީއަށް ލިބޭ ކާމިޔާބީއެއްކަމަށެވެ. އަދި ފިލްމް އިންޑަސްޓްރީގައި ހަރަކާތްތެރިވާ ހުރިހާ ފަންނާނުން މިހާތަނަށް ނެރެފައި ހުރި ފިލްމްތަކަށްވުރެ ކުޅަދާނަ ފިލްމްތަކެއް ތައްޔާރުކޮށް ކުރިއަށްއޮތް ފިލްމް އެވޯޑުތަކަށް މަސައްކަތް ކުރުމަށް ވަނީ އިލްތިމާސްކުރައްވާފައެވެ.
" ރާއްޖެއިން ބޭރުގައި ބާއްވާ ފިލްމްފެސްޓިވަލްތަކުގައި ދިވެހި ތަރިން ހޯދާ ކާމިޔާބުތައްދަނީ އިތުރުވަމުން. ސަރަޙައްދީފެންވަރުގައި ބާއްވާ މުބާރާތްތަކުގައި ރާއްޖޭގެ ތަރިން ބައިވެރިކުރެވި ރާއްޖެއަށް ރީތި ނަން ހޯދާފައިވޭ. ދިވެހި ފިލްމްތަކަކީ ބައިނަލްއަޤްވާމީ ފެންވަރުގައި ކުރިއަށްދާނެ ފިލްތަކެއް. ކުރިއަށްގެންދެވޭނެ ފިލްމްތަކެއްކަމަށް ޓަރގެޓްކުރުން." މިނިސްޓަރ އިރުތިޝާމް ވިދާޅުވިއެވެ.
ވޭތުވެދިޔަ އަހަރުތަކުގައި ފިލްމް އިންޑަސްޓްރީން ލައިފްޓއިމް އެވޯޑް ހާސިލްކޮށްފައިވާ މީހުން މިސާލެއްގެ ގޮތުގައި ބަލައިނަގެ ދިވެހި ފިލްމްގެ ކޮލެޓީއާއި ދިވެހި ސަޤާފަތަށް ހުރުމަތްތެރިކޮށްހިތާ މޮޅު ފިލްމްތަކެއް ގެނައުން މުހިއްމުކަމަށްވެސް މިނިސްޓަރ ވިދާޅުވިއެވެ. އަދި ދިވެހިން ބަލައިގަންނަ ދިވެހިވަންތަ ފިލްމްތައް ގިނަކުރުމަށްވެސް މިނިސްޓަރ އިލްތިމާސްކުރެއްވިއެވެ.
މިފަހަރުގެ ފިލްމް އެވޯޑްސްގައި ޖުމްލަ 31 ދާއިރާއަކުން އެވޯޑް ވަނީ ދީފައެވެ. އޭގެތެރޭގައި ހިމެނެނީ ފީޗާރ ފިލްމްގެ ބައިން 23 އެވޯޑަކާއި ކުރު ފިލްމުގެ ބައިން 8 އެވޯޑެކެވެ.