ވިއެޓްނާމްގައި އޮންނަ ޓެނިސް މުބާރާތަކަށް ދިއުމަށް ޤައުމީ ޖޫނިއަރ ޓެނިސް ޓީމް ތައްޔާރުވާން ފަށައިފިއެވެ.
ސާދަ އަހަރުން ދަށުގެ ޤައުމީ ޓެނިސް ޓީމް މިހާރު ފަރިތަކުރަމުން ދަނީ އަންނަމަހު ހަތްވަނަ ދުވަހު ވިއެޓްނާމްގައި ފަށާ އިންޓަނޭޝަނަލް ޓެނިސް ފެޑެރޭޝަން، އައިޓީއެފް އަންޑަރ ފޯޓީން މުބާރާތަށެވެ. މިމުބާރާތަށް ރާއްޖޭގެ ޓީމް ތައްޔާރުވަމުން ދަނީ ޓެނިސް ކުޅުންތެރިޔާ އަހުމަދު އަކުރަމްގެ އިރުޝާދުގެ ދަށުންނެވެ. ޓީމްގެ ތައްޔާރުވުންތަކާ ގުޅޭގޮތުން އަކުރަމް ބުނީ މިއީ ރާއްޖެއިން ނެގެން ތިބި އެންމެ ރަނގަޅު ކުޅުންތެރިން ކަމަށާއި، ސާދަ އަހަރުން ދަށުގެ ޤައުމީ ޓީމްގައި ހިމެނެނީ ދަށް އުމުރުފުރާ ތަކުގެ ޗެންޕިއަނުންނާއި، ރަނަރަޕް ކުޅުންތެރިން ކަމަށެވެ.
މި މުބާރާތުގައި އޭޝިޔާގެ އެގާރަ ގައުމަކުން ވާދަކުރާނެއެވެ. އަކުރަމް ބުނީ މުބާރާތުގައި ސަރަހައްދުގެ ޤައުމުތަކުގެ ތެރެއިން ނޭޕާލް އާއި ބޫޓާން ފަދަ ގައުމުތަކާ ވާދަކުރެވުނު ނަމަވެސް އިންޑިޔާއާއި ސްރީލަންކާ ފަދަ ޤައުމުތަކާ ވާދަނުރެވޭނެކަމަށެވެ.
" ރަނގަޅު ކުޅުންތެރިން އެބަތިބި މިޓީމްގައި، ހާއްސަކޮށް ކޮންމެ އޭޖްއަކުން ޗެމްޕިއަން ރަނަރަޕް ހިމެނޭ"
މިމުބާރާތުގައި ޖޫނިއަރ ޤައުމީ ޓެނިސް ޓީމް ވާދަކުރާނީ ދެވަނަ ޑިވިޝަންގައެވެ. މިމުބާރާތުގައި ސިންގަލްސް އަދި ޑަބަލްސް މެޗުތައް ކުޅުމަށް ހަމަޖެހިފަވެއެވެ. މުބާރާތައް ޖޫނިއަރ ޤައުމީ ޓެނިސް ޓީމް ފުރާނީ އަންނަމަހުގެ ހަވަނަ ދުވަހުއެވެ.