މީޑިޔާ ޕާޓްނަރަކަށް ޕީއެސްއެމް ހަމަޖައްސާ، ސްޕޯޓްސް ފޯރ އޯލްގެ ހަރަކާތްތައް ލ.އަތޮޅު ގަމުގެ އިތުރުން ފޮނަދޫގައި އަންނަ މަހު ބާއްވަން ނިންމަވައިފިއެވެ.
" ދުޅަހެޔޮ ދިރިއުޅުމަކަށް ކުޅިވަރު" މި ޝިއާރުގެ ދަށުން ދުޅަހެޔޮ ސިއްހަތެއްގައި ތިބުމަށް އަހުލުވެރިކުރުމުގެ ގޮތުން ހުރިހާ އުމުރުފުރާތަކަކަށް އަމާޒުކޮށްގެން ބާއްވާ ފެސްޓިވަލް އޮންނާނީ އަންނަމަހު ސޯޅައިން ސަތާރައަށް ލ.އަތޮޅު ފޮނަދޫގެ އިތުރުން ގަމުގައެވެ. ފެސްޓިވަލްގައި ހިމެނޭ ކުޅިވަރުތަކަކީ ފުޓްސެލް، ހޭންޑްބޯލް، ބަށި، ވޮލީ، ފައިގަ ތަޅާ، އެތުލެޓިކްސް އަދި ބައިސްކަލްގެ ހާއްސަ އިވެންޓްތަކެކެވެ.
ސްޕޯޓްސް ފޯރ އޯލް ފެސްޓިވަލާ ގުޅޭގޮތުން ވާހަކަދައްކަވަމުން ޔޫތް މިނިސްޓަރ އިރްތިޝާމް އާދަމް ވިދާޅުވީ މިއީ ހުރިހާ އުމުރަކަށް ހުޅުވާލައިގެން ބާއްވާ އިވެންޓެކަމަށާއި، ހަތަރު އަހަރުގެ މެދުކެނޑުމަށްފަހު ދެހާސް ސޯޅަވަނަ އަހަރުން ފެށިގެން އިވެންޓް ބޭއްވިގެންދަނީ ގިނަ ކުޅިވަރު އެސޯސިއޭޝަންތަކެއްގެ އެއްބާރުލުމާއެކުކަމަށެވެ. މިއީ ދުޅުހަޔޮ ސިއްހަތެއްގައި ހުރުމައްޓަކައި ހުރިހާ އުމުރެއްގެ މީހުން ބައިވެރިވާން މުހިންމު އިވެންޓެންކަން މިނިސްޓަރ ފާހަގަކުރެއްވިއެވެ.
" ހަތަރު އަހަރުގެ މެދުކެނޑުމަކަށް ފަހު މި ފެސްޓިވަލް މިބޭއްވެނީ. މިއީ ހުރިހާ އުމުރެއްގެ ބޭފުޅުންނަށްވެސް ދުޅަހެޔޮ ސިއްހަތެއްގައި ހުރުމައްޓަކައި ލިބިގެންދާނެ ރަނގަޅު ފުރުސަތެއް." މިނިސްޓަރ ވިދާޅުވިއެވެ.
އެއްބަސްވުމުގައި ސޮއިކުރެއްވުމަށްފަހު ޕީއެސްއެމްގެ ޑެޕިއުޓީ މެނޭޖިންގ ޑައިރެކްޓަރ މުހަންމަދު އިކްރާމް އަބްދުލް ލަތީފް ވިދާޅުވީ ފެސްޓިވަލްގެ ވަރަށް ރަނގަޅު ކަވަރޭޖެއް ގެނެސްދެއްވާނެކަމަށެވެ. އަދި ފެސްޓިވަލުގެ ތައްޔާރީތައް ފެސްޓިވަލު ފެށުމުގެ ކުރިންވެސް ލ.އަތޮޅުން ގެނެސްދެއްވާނެކަމަށް އިކުރާމް ވިދާޅުވިއެވެ.
މިފަހަރުގެ ފެސްޓިވަލްގައި ގައުމީ އަންހެން ވޮލީޓީމާއި ލ.އަތޮޅުން ހޮވާލެވޭ އަންހެނުންގެ ވޮލީޓީމަކާއެކު ހާއްސަ ވޮލީ މެޗެއް ކުޅުމަށްވެސް ވަނީ ހަމަޖެހިފައެވެ. ފެސްޓިވަލްގައި ރާއްޖޭގެ ކުޅިވަރު އެސޯސިއޭޝަންތަކާއި ރާއްޖޭގެ މަޝްހޫރު ކުޅިވަރު އެތުލީޓުން ބައިވެރިވާނެއެވެ.