އިސްލާމިކް މިނިސްޓްރީއާއި ޕަބްލިކް ސަރވިސް މީޑިއާ ޕީއެސްއެމް ގުޅިގެން ކޮންމެ ހުކުރު ދުވަހަކު ބާއްވާ ހުކުރު އުފާ ފެސްޓިވަލް މިއަދާއި މިރޭވެސް އޮންނާނެއެވެ.
މިފެސްޓިވަލްގައި މިއަދު ހަވީރު ހަތަރަކުން އިރު އޮއްސި ހަޔަކަށް ކުޑަކުދިންނަށް ޚާއްޞަ ގިނަ ހަރަކާތްތަކެއް ކުރިޔަށްދާނެއެވެ. މިހަފްތާގެ މި ފެސްޓިވަލްގައިވެސް ދީނީ ފޮތްތަކާއި މުސްޙަފު ބެހުން ކުރިއަށްދާނެއެވެ. މީގެ އިތުރުން ތަފާތު ސްޓޯލްތަކުން ދީނީ މަޢުލޫމާތު ހިމެނޭ ފޮތްތައް ވިއްކުމާއި، ކުޑަކުދިންނަށާއި ބޮޑެތި މީހުނަށް ދީނީ މަޢުލޫމާތު ދިނުންވެސް ކުރިއަށްދާނެއެވެ.
ހުކުރު އުފާގެ މިރޭގެ ދަންފަޅީގައި "ގެއްލިފައިވާ އިޖްތިމާޢީ އަދަބުތައް" މި މަޢުޝޫއަށް ވާހަކަދެއްކުމަށް ވަނީ ހަމަޖެހިފައެވެ. މި މަޢުޝޫއަށް ވާހަކަ ދައްކަވާނީ ޑރ. އަޝްރަފް ޢަބްދުއްރަޙީމް އެވެ.
ދެ ދަންފަޅިއަށް ކުރިއަށް ގެންދާ ހުކުރު އުފާ އިސްލާމީ ފެސްޓިވަލަކީ ޕީއެސްއެމްއާއި އިސްލާމިކް މިނިސްޓްރީ ގުޅިގެން އިސްލާމީ ވެށްޓެއްގައި މުނިފޫހިފިލުވުމާއި މަޢުލޫމާތު ބަދަލުކުރުމުގެ ފުރުޞަތު ފަހިކޮށްދިނުމުގެ ގޮތުން ކޮންމެ ހަފްތާއެއްގެ ހުކުރުދުވަހު ކުރިއަށް ގެންދާ ޙަރަކާތެކެވެ.