ދޮށީ އުމުރުގެ މީހުންނަށް ރަށު ފެންވަރުގައި ފޯރުކޮށްދޭ ޚިދުމަތްތައް ހަރުދަނާކުރުމުގެ މަޤްޞަދުގައި ޞިއްޙީ އަދި އިޖްތިމާޢީ ޚިދުމަތްތެރިންނަށް އަމާޒުކޮށް ދ.ކުޑަހުވަދޫގައި ކުރިއަށްގެންދިޔަ ވަރކްޝޮޕް ނިންމާލައިފިއެވެ.
ތިންދުވަހުގެ މުއްދަތަށް ކުރިއަށްގެންދިޔަ މި ވަރކްޝޮޕްކީ ދޮށީ ޢުމުރުގެ މީހުންނަށް އަމާޒުކޮށްގެން މިނިސްޓްރީ އޮފް ޖެންޑަރ އެންޑް ފެމިލީން ހިންގާ "ރަންވޭލާ" ކެމްޕޭންގެ ހަރަކާތްތަކުގެ ތެރެއިން ހަރަކާތެކެވެ. މި ވަރކްޝޮޕްގައި ދ.އަތޮޅުގެ ހުރިހައި ރަށަކުންނާއި، ތ.އަތޮޅުގެ 12 ރަށަކުން 34 މިހުން ބައިވެރިވެއެވެ. މީގެ ތެރޭގައި ހެލްތު ވަރކަރުންނާއި ސޯޝަލް ސަރވިސް ވަރކަރުން ބައިވެރިވިއެވެ. މި ވޯކްޝޮޕްގައި އަލިއަޅުވައިލާފައިވާ ބައިތަކުގެ ތެރޭގައި ދޮށީ އުމުރުގެ މީހުންނަށް ދިމާވާ ޞިއްޙީ އަދި ނަފްސާނީ މައްސަލަތަކާއި، އެ ފަރާތްތަކަށް މުޖުތަމަޢުގައި ދިމާވާ ދަތިތަކާއި، ދާނުގައި ތިބޭ ދޮށީ އުމުރުގެ މީހުންނަށް ބޭނުންވާ އަޅައިލުމުގެ އިތުރުން ޕެންޝަނާ ގުޅޭ މުހިންމު މަޢުލޫމާތު ތަކެއް ބައިވެރިންނަށް ވަނީ ޙިއްސާކޮށްފައެވެ.
މި ވަރކްޝޮޕް ނިންމާލުމަށް ބޭއްވި ރަސްމިއްޔާތުގައި ބައިވެރިންނަށް ހަނދާނީ ލިޔުން ޙަވާލުކޮށްދެއްވުމަށްފަހު ވާހަކަދައްކަވަމުން ޖެންޑަރ މިނިސްޓަރ ޒެނީޝާ ޝަހީދު ޒަކީ ވިދާޅުވީ ދޮށީ ޢުމުރުފުރައިގެ މީހުން، އެމީހުންގެ ޒުވާން ދުވަސްވަރު ކޮށްފައިވާ އަގުހުރި މަސައްކަތްތައް ޤަބޫލްކޮށް އެކަމުގެ އަގްވަޒަން ކުރަންޖެހޭކަމަށެވެ. އަދި އެމީހުންނާއެކު ވަގުތު ހޭދަކޮށް އެމީހުންގެ ތަޖުރިބާތަކުން އަދުގެ ޖީލުން އިތުރު ކަންތައްތަކެއް ދަސްކުރުމަށް މިނިސްޓަރ ގޮވާލެއްވިއެވެ. މިނިސްޓަރ ވިދާޅުވީ ދޮށީ ޢުމުރުފުރައިގެ މީހުން އާކަންތައްތަކެއް ދަސްކޮށް، މުޖުތަމަޢާއި ޢާއިލާގެ އެކި ކަންކަމުގައި މަސްއޫލްވެ، އުޅުމަކީ އަދުގެ ޒުވާން ޖީލަށ ލިބޭ ހިތްވަރަކާއި ނަމޫނާއެއްކަން ފާހަގަކުރެއްވިއެވެ.
" ދޮށީ ޢުމުރުފުރައިގެ މީހުންނަށް އަޅުގަނޑުމެން ކޮށްދެވޭނެ އެއްކަމަކީ ޢާއިލާގެ ތެރޭގައާއި މުޅި މުޖުތަމައުގެ ތެރޭގައި ހުރި ކަންކަމުގައި ބައިވެރިވުމަށް ހިތްވަރުދިނުން. މިއަދު ރާއްޖޭގެ އެކި ކަންކޮޅުތަކުގައި ޢުމުރުން ދުވަސްވީ މީހުން ކަސްރަތާއި ސިއްޙަތުގެ ހަރަކާތްތަކުގައި ހަރަކާތްތެރިވެ އުޅޭތަބް ފެނުމަކީ އަޅުގަނޑަށްލިބޭ އުފަލެއް." ޖެންޑަރ މިނިސްޓަރ ޒެނީޝާ ޝަހީދު ޒަކީ ވިދާޅުވިއެވެ.
ރަންވެލާ ކެމްޕޭންގެ ތެރެއިން ދޮށީ ޢުމުރުގެ މީހުންގެ ބައިވެރިވުން މުޖުތަމަޢުގައި އިތުރުކުރުމަށާއި، އެ ފަރާތްތަކަށް ބޭނުންވާ އަޅާލުމާއި އެހީތެރިކަން ލިބޭނެ ގޮތްތައް މަގުފަހިކޮށްދިނުމަށާއި، އެ ފަރާތްތަކުގެ ޖިސްމާނީ އަދި ނަފްސާނީ ދުޅަހެޔޮކަން އިތުރުކުރުމުގެ މުހިންމުކަމާމެދު ހޭލުންތެރިކަން އިތުރުކުރުމުގެ ސެޝަންތަކެއް ދ.އަތޮޅުގެ ކުޑަހުވަދޫ، މީދޫ، ބަނޑިދޫ، ހުޅުދެލި، ރިނބުދޫ އަދި މާއެނބޫދޫގައިވަނީ ހިންގާފައެވެ. މީގެ އިތުރުން ދޮށީ ޢުމުރުގެ މީހުންނަށް އަމާޒުކޮށްގެން ހެލްތު ސްކްރީނިންގ ޕްރޮގްރާމްތަކެއްވެސް ދ.އަތޮޅު ހޮސްޕިޓަލާއި ހެލްތު ސެންޓަރުތައް ގުޅިގެން ދ.އަތޮޅުގެ ހުރިހައި ރަށެއްގައި ހިންގައިފައެވެ.