ބަލި މީހުންނަށް ފަރުވާދިނުމުގައި ފުރިހަމަގޮތުގައި ލޭ ބޭނުންކުރުމަށްޓަކައި ޑޮކްޓަރުންނާއި، ނަރުހުންޏާއި ލެބޯޓަރީގައި ހަރަކާތްތެރިވާ ފަރާތްތަކަށް ޚާއްސަކޮށްގެން ސެމިނަރއެއް ކުރިއަށްގެންގޮސްފިއެވެ.
ހޮޓެލް ޖެންގައި ކުރިއަށް ގެންދިޔަ މި ސެމިނަރއަކީ އައިޖީއެމްއެޗްގެ ނޭޝަނަލް ހެލްތުކެއާ އެކަޑާމީއާއި ޑިޕާޓްމަންޓް އޮފް ލެބޯރެޓަރީ މެޑިސިންއާއި އެސްޓީއޯގެ އިތުރުން އޭޝިއަން އެސޯސިއޭޝަން އޮފް ޓްރާންސްފިއުޝަން މެޑިސިންއާއި އެމެރިކަން އެސޯސިއޭޝަން އޮފް ބްލަޑް ބޭންކާއި އިންޑިއަން އިމިއުނޯހެމެޓޮލޮޖީ އިނީޝިއޭޓިވް ގުޅިގެން ކުރިއަށްގެންދިޔަ ސެމިނަރަ އެކެވެ.
އައިޖީއެމްއެޗާއި އޭޑިކޭ ހޮސްޕިޓަލް ، ހުޅުމާލޭ ހޮސްޕިޓަލް، މޯލްޑިވިއަން ބްލަޑް ސަރިވސް އިން ގާތްގަނޑަކަށް 70 މީހުން މިސެމިނަރ ގައި ބައިވެރިވި ލެބް ޓެކްނީޝަނުންނާއި، ޑޮކްޓަރުންނާއި ނަރުހުން ހޭލުންތެރިކޮށް ތަފާތު ލޭގެ ގުރޫޕުތައް ޓެސްޓުކޮށް ބަލި މީހާއަށް އެންމެ ރަނގަޅު ލޭގެ ގުރޫޕު އިޚްތިޔާރުކުރާނެ ގޮތައް ވަނީ މި ސެމިނަރގައި ކިޔާދީފައެވެ.
މިސެމިނަރގައި މަޢުލޫމާތު ދެއްވަމުން ޑރ.އަޙްމަދު އުމަރު ވިދާޅުވީ މި ސެމިނަރގެ ސަބަބުން ރާއްޖޭގައި މަސައްކަތްކުރާ ޑޮކްޓަރުންނަށާއި، ނަރުހުނަށާއި ލެބޯޓަރީތަކުގައި މަސައްކަތްކުރާ މުވައްޒަފުންނަށް ކުރިން ނޭގެ ވަރަށް ގިނަ މަޢުލޫމާތުތަކެއް ލިބިގެންދާނެކަމަށެވެ. އަދި މި ސެމިނަރއިން ލިބުނު މަޢުލޫމާތުގެ އަލީގައި ރާއްޖޭގައި މިހާރު ލޭގެ ޚިދުމަތް ދިނުމުގައި ޢަމަލުކުރާ އުސޫލްތަކާއި ގޮތްތަކަށް ފުރިހަމަކަމެއް ލިބިގެންދާނެކަމަށްވެސް އޭނާ ވިދާޅުވިއެވެ.
"މި ސެމިނަރައިން ކުރިންނޭގެ ގިނަ މަޢުލޫމާތުތަކެއް ލިބިގެންގޮސްފި. ކުރިއަތް އޮތްތަނުގައި ރާއްޖޭގެ ސިއްޙީ ދައިރާގައި މަސައްކަތްކުރާ މީހުންނަށް ލޭގެ ބާވަތްތައް އޭގެ އެންމެ ފުރުހަމަގޮތުގައި ބޭނުންކުރުމަށް އިތުރު ހިތްވަރެއް ލިބިގެންދާނެ." ޑރ.އަޙްމަދު އުމަރު ވިދާޅުވިއެވެ.
އެއްދުވަހުގެ މުއްދަތަށް ކުރިއަށްގެންދިޔަ މި ސެމިނަރގައި މަޢުލޫމާތުތައް ބައިވެރިންނާ ޙިއްސާކޮށްފައިވަނީ އިންޑިއާ، ސްރީލަންކާ، ޕާކިސްތާން، ޔޫ،އެސް.އޭގެ ޑޮކްޓަރުންނެވެ.