ރޯދަމަހުގެ މިހާތަނަށް އެއްތިރީސް ހާހަށްވުރެ ގިނަ މީހުން ފިޠުރު ޒަކާތް ދައްކާފައިވާކަމަށް އިސްލާމިކް މިނިސްޓްރީން ބުނެފިއެވެ.
މާލޭގެ އިތުރުން އަތޮޅުތެރޭގައި ފިތުރު ޒަކާތް ދެއްކުމުގެ އިންތިޒާމްތައް އިސްލާމިކް މިނިސްޓްރީން ވަނީ ހަމަޖައްސަވާފައެވެ. މިގޮތުން އެސްއެމްއެސް މެދުވެރިކޮށް ފިޠުރު ޒަކާތް ދެއްކުމާއި ބޭންކުތައް މެދުވެރިކޮށް ޒަކާތް ދެއްކޭނެ އިންތިޒާމްތައް އެ މިނިސްޓްރީން ވަނީ ހަމަޖައްސާފައެވެ.
އިސްލާމިކް މިނިސްޓްރީން ބުނީ މިހާތަނަށް 31944 މީހުން ޒަކާތް ދައްކާފައިވާކަމަށެވެ. އަދި 1.2 މިލިއަން ރުފިޔާ ޒަކާތުގެ ގޮތުގައި ލިބިފައިވާކަމަށްވެސް އެ މިނިސްޓްރީން ބުނެއެވެ.
ޒަކާތުގެ ގޮތުގައި ލިބިފައިވާ މި ފައިސާއަކީ އިސްލާމިކް މިނިސްޓްރީއަށާއި އެޗްޑީސީ، ވިލިމާލެ ޔުނިޓް، ބީއެމްއެލް، އެމްއައިބީ، ދިރާގު އަދި އުރީދޫ މެދުވެރިކޮށް ލިބިފައިވާ ފައިސާއެވެ.
ޒަކާތް ނެރެންޖެހެނީ އެ މީހަކު އާއްމުކޮށް ކައިއުޅޭ ހަނޑުލުގެ ބާވަތަކުންނެވެ. ފިތުރު ޒަކާތުގެ ނެރެންޖެހޭ މިންވަރަކީ މީހަކަށް 2.4 ކިލޯ ހަނޑުލުގެ މިންވަރަށްވާ ފައިސާއެވެ. މާލޭގައި ދިރިއުޅޭ ފަރާތްތަކުން ޒަކާތް ދައްކަން ޖެހެނީ އާދައިގެ ހަނޑުލުންނަމަ މީހަކަށް 13 ރުފިޔާ، ތައިލެންޑް ހަނޑުލުންނަމަ 43 ރުފިޔާ، ބާސްމަތީ ހަނޑުލުންނަމަ 81 ރުފިޔާއެވެ.