ޕަބްލިކް ސަރވިސް މީޑިއާ (ޕީއެސްއެމް)ގެ ޓީވީއެމް އިން ގެނެސްދޭ މަޝްހޫރު ޤުރްއާން މުބާރާތް ދިވެހިރާއްޖޭގެ އެންމެ އަލިގަދަ ތަރި ޖޫނިއަރގެ ގަދަ 6 ބައިވެރިން ކަށަވަރުވެއްޖެއެވެ.
ޖުމުލަ 12 ބައިވެރިންނާއެކު ފެށި މިމުބާރާތުގެ ކޮންމެ ޝޯއަކުން ދެ ބައިވެރިން ދަނީ ވަކިވަމުންނެވެ.
މުބާރާތުގެ ގަދަ 6 ބައިވެރިން ޔަޤީންވެފައިވާއިރު މި މުބާރާތުން އެންމެފަހުން ވަކިވެގެންދިޔައީ މާޔާ މުޙައްމަދާއި ފާޠިމަތު ޝާހާ މުޙައްމަދެވެ. މި ދެބައިވެރިން މުބާރާތާ ވަކިވެފައިވަނީ މުބާރާތުގެ ފަނޑިޔާރުންގެ ވޯޓުންނެވެ.
ދިވެހިރާއްޖޭގެ އެންމެ އަލި ގަދަ ތަރި ޖޫނިއަރއަކީ ކީރިތި ޤުރުއާން ކިޔެވުމުގެ ހުނަރާއި، ޤުރާއާނާމެދު މުޖުތަމަޢުގައި އޮންނަ ޤަދަރު މަތިކޮށް، ޤުރުއާނާމެދު ކުޑަކުދިންގެ ހިތްތަކުގައި ލޯބިޖެއްސުމުގެ ގޮތުން ގެނެސްދޭ މުބާރާތެކެވެ. ރޭގެ ޝޯ ގައި ގެނެސްދީފައިވަނީ ގަދަ 6 ބައިވެރިންގެ ކިޔެވުމެވެ.
މުބާރާތުގައި ވާދަކުރާ ގަދަ 6 ބައިވެރިން:
1. މަރިޔަމް މަހާ މުޙައްމަދު
2. ޢަބްދުﷲ ޙަޔާން ޙަމީޒް
3. މުޙައްމަދު ޝައިޙާން ޢަލީ
4. ޢަލީ ސައުދާން ޝަހީމް
5. އަލްޙާފިޡް ނާދިހް ޢަބްދުލްޙަމީދު
6. މުޙައްމަދު ސާޢީ މުބާރިކް
މި ޝޯގައި ބައިވެރިން ކިޔަވާފައިވަނީ އެ ކުއްޖަކު ބޭނުން ރާގަށް ބަލައިގެންނެވެ. ދެވަނަ ބުރުގައ ބައިވެރިންނާވަނީ ތަޖުވީދުގެ ބައެއް ސުވާލުތައްވެސްކޮށްފައެވެ. އަންނަ ބުދަދުވަހުގެ ރޭ ދައްކާ މި މުބާރާތުގެ ޝޯގައި ދެ ބައިވެރިއަކު އަނެއްކާވެސް މުބާރާތުން ވަކިވެ މުބާރާތުގެ ގަދަ 4 ޔަޤީންވާނެއެވެ.
ޢުމުރުން 8 އަހަރާއި 16 އަހަރާ ދެމެދުގެ ކުދިންނަށް ހުޅުވާލައިގެން ކުރިއަށްގެންދާ މި މުބާރާތުގެ 1 ވަނަ އަށް ހޮވޭ ކުއްޖަކަށް 3 ލައްކަ ރުފިޔާގެ ފައިސާގެ އިނާމެއް ދިނުމަށްވަނީ ހަމަޖެހިފައެވެ. ދެވަނައަށް 150000 ރުފިޔާ އަދި 3 ވަނަ އަށް 50،000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވެއެވެ.