މިހާތަނަށް 106357 (އެއްލައްކަ ހަ ހާސް ތިންސަތޭކަ ފަންސާސް ހަތެއް) މީހުން ފިޠުރު ޒަކާތް ދައްކާފައިވާކަމަށް އިސްލާމިކް މިނިސްޓްރީން ހާމަކޮށްފިއެވެ.
މާލޭގެ އިތުރުން އަތޮޅުތެރޭގައި ފިތުރު ޒަކާތް ދެއްކުމުގެ އިންތިޒާމްތައް އިސްލާމިކް މިނިސްޓްރީން ވަނީ ހަމަޖައްސަވާފައެވެ. މިގޮތުން އެސްއެމްއެސް މެދުވެރިކޮށް ފިޠުރު ޒަކާތް ދެއްކުމާއި ބޭންކުތައް މެދުވެރިކޮށް ޒަކާތް ދެއްކޭނެ އިންތިޒާމްތައް އެ މިނިސްޓްރީން ވަނީ ހަމަޖައްސާފައެވެ.
އިސްލާމިކް މިނިސްޓްރީން ބުނީ މިހާތަނަށް އެއްލައްކަ ހަ ހާހަށްވުރެ ގިނަ މީހުން ޒަކާތް ދައްކާފައިވާއިރު، ފައިސާގެ ގޮތުގައި 4051748 (ހަތަރު މިލިޔަން ފަންސާސް އެއްހާސް ހަތްސަތޭކަ ސާޅީސްއަށެއް) ރުފިޔާ ލިބިފައިވާކަމަށެވެ. މިގޮތުން އިސްލާމިކް މިނިސްޓްރީއަށް 46701 މީހުން ޒަކާތް ދައްކާފައިވާއިރު 1759622 (އެއްމިލަން ހަތްލައްކަ ފަންސާސް ނުވަހާސް ހަސަތޭކަ ބާވީސް) ރުފިޔާ ވަނީ ލިބިފައެވެ. ބީއެމްއެލް މެދުވެރިކޮށް 26504 (ސައްބީސް ހާސް ފަސްސަތޭކަ ހަތަރެއް) މީހުން ޒަކާތްދައްކާފައިވާއިރު ލިބިފައިވަނީ 1318976 (އެއްމިލިއަން ތިންލައްކަ އަށާރަހާސް ނުވަސަތޭކަ ހަތްދިހަ ހައެއް) ރުފިޔާއެވެ.
އޫރިދޫ މެދުވެރިކޮށް 5456 މީހުން ޒަކާތް ދައްކާފާއިވާއިރު ލިބިފައިވަނީ 138334 (އެއްލައްކަ ތިރީސް އަށްހާސް ތިންސަތޭކަ ތިރިސް ހަތަރެއް) ރުފިޔާއެވެ. އަދި ދިރާގުމެދުވެރިކޮށް 14559 މީހުން ޒަކާތްދެއްކިއިރު ލިބިފައިވަނީ 421095 (ހަތަރުލައްކަ އެކާވީސް ހާސް ނުވަދިހަ ފަހެއް) ރުފިޔާއެވެ. މީގެ އިތުރުން އެމްއައިބީ މެދުވެރިކޮށް 2670 ޒަކާތްދައްކާފައިވާއިރު ޒަކާތުގެ ގޮތުގައި 129726 (އެއްލައްކަ ނަވާވީސް ހާސް ހަތްސަތޭކަ ސައްބީސް) ރުފިޔާ ލިބިފައިވެއެވެ.
ވިލިމާލޭގެ ޔުނިޓަށް 3202 މީހުން ޒަކާތް ދައްކާފައިވެއެވެ. މި ޔުނިޓަ ފައިސާގެ ގޮތުގައި 73484 ރުފިޔާ ލިބިފައިވެއެވެ. އަދި އެޗްޑީސީއަށް 7265 މީހުން ޒަކާތް ދައްކާފައިވާއިރު 210511 (ދެލައްކަ ދިހަ ހާސް ފަސްސަތޭކަ އެގާރަ) ރުފިޔާ ލިބިފައިވެއެވެ.
ފައިސާގެ އިތުރުން މިއަހަރުވެސް ގޮވާމުގެ ބާވަތްތަކުން ޒަކާތް ދެއްކުމުގެ ފުރުޞަތު އިސްލާމިކް މިނިސްޓްރީ ވަނީ ހުޅުވާލާފައެވެ. މިގޮތުން ގޮވާމުގެ ބާވަތްތަކުން 2292 މީހުން ޒަކާތްދައްކާފައިވާއިރު 5500.8 ކިލޯ ގްރާމްގެ ގޮވާން ލިބިފައިވާކަމަށް އިސްލާމިކް މިނިސްޓްރީން ބުނެއެވެ. މީގެ ތެރޭގައި 758 މީހުން ޒަކާތުގެ ގޮތުގައި ދައްކާފައިވާ 1819.20 ކިލޯގެ އާދައިގެ ހަނޑުލާއި، 28 މީހަކު ޒަކާތުގެ ގޮތުގައި ދައްކާފައިވާ 67.20 ކިލޯގެ ތައިލެންޑް ހަނޑޫ ހިމެނެއެވެ. މީގެ އިތުރުން 1449 މީހަކު ޒަކާތުގެ ގޮތުގައި ދައްކާފައިވާ 3477.60 ކިލޯގެ ބާސްމަތީ ހަނޑުލާއި 11 މީހަކު ޒކާތުގެ ގޮތުގައި ދައްކާފައިވާ 26.40 ކިލޯގެ ރަތް ހަނޑޫ ހިމެނެއެވެ.
މީގެ އިތުރުން ގޮދަންފުށުންވެސް ޒަކާތްދައްކާފައިވެއެވެ. މިގޮތުން 46 މީހުން 110.40 ކިލޯގެ ގޮދަންފުށުން ޒަކާތުގެ ގޮތުގައި ދައްކާފައިވާކަމަށްވެސް އިސްލާމިކް މިނިސްތްރީން ބުނެއެވެ.