އިސްލާމްދީނުގައި ކަނޑައަޅުއްވާފައިވާ ޢީދުތަކުގައި ޚާއްޞަ ސިފަތަކެއްހުރެއެވެ. އެންމެ ފުރަތަމަ ކަމަކީ މުސްލިމުންގެ ކޮންމެ ޢީދަކީވެސް ކަނޑައެޅިފައިވާ ޚާއްސަ އަސާސުތަކެއްގެ މަތީގައި ފާހަގަކުރާ ދުވަސްތަކެކެވެ.
މުސްލިމުން ފިޠުރުޢީދު ފާހަގަކުރަނީ އެންމެހައި މުސްލިމުންގެ މައްޗަށް މާތްﷲ ފަރުޟުކުރެއްވި، ރޯދަ ރަމަޟާންމަހުގައި ހިފައި ނިމުމަށްފަހު އެކަމުގެ އުފަލުގައެވެ. ރަމަޟާން މަސް އަޅުގަނޑުމެންނަށް މިންވަރުކުރެއްވީތީ އުފާކުރަންޖެހޭ ވަރަށްގިނަ ސަބަބުތައް އެބަހުއްޓެވެ.
މާތްﷲ އެކަލާނގެ ކަލާމްފުޅު، ކީރިތި ޤުރުއާން ބާވައިލައްވަން ފެށްޓެވީ ރަމަޟާންމަހެއްގެ ތެރޭގައި ހިމެނޭ ލައިލަތުލްޤަދުރި ވިލޭރޭގައެވެ. އެއީ އެއްހާސް މައްސަރަށްވުރެ ހެޔޮކަންބޮޑު ރެއެއްކަމުގައި އެކަނލާނގެ ވަނީ އަންގަވާފައެވެ. ފާފަފުއްސެވުމާއި، ރަޙުމަތާއި، ނަރަކައިން ސަލާމަތްކުރެއްވުމުގެ މި 30 ދުވަހަކީ އަޅުގަނޑުމެންގެ ޙަޔާތުގެ ދުވަސްތަކުގައި މާތްﷲ ދެއްވި ވަރަށްބޮޑު ނިޢުމަތެކެވެ.
އެތައްދުވަސްތަކެއް ވަންދެން ކުރެވުނު ފާފަތައް ކުޑަވަގުތުކޮޅެއްގެ ތެރޭގައި ފުއްސަވައި އެތައްގިނަގުނަ ސަވާބާއި ނަސީބު މިމަހުގެ ތެރޭގައި މާތްﷲ ވަނީ އަޅުގަނޑުމެންނަށް މިންވަރުކުރައްވާފައެވެ. އެހެންކަމުން ފިޠުރު ޢީދު ދުވަހު ފާޅުކުރަނީ އެކަމުގެ އުފަލެވެ.
ޢީދަކީ ވަކި ފަންތިއަކަށް ވަކި ގިންތިއަކަށް އެކަނި އޮންނަ އުފަލެއްނޫންނެވެ. އެއީ މުޅި އިސްލާމީ އުންމަތަށް އަންނަ އުފަލެކެވެ. އެއުފަލުގައި އެންމެން ޝާމިލްކުރުމަށް އިސްލާމްދީން ވަރަށްބޮޑަށް ބާރުއަޅައި އެކަމަށް އަމުރުކުރެއެވެ. ފިޠުޒަކާތުގެ މަޤުސަދުތަކުގެ ތެރޭގައި އެކަން ހިމެނެއެވެ. ފޯރުންތެރިކަން ކުޑަ ނިކަމެތި ފަޤީރުންނަށް ޢީދުގެ އުފާ ލިއްބައިދިނުމަށް ފިޠުރު ޒަކާތުން މަގުފަހިވެއެވެ. ސަދަޤާތްކުރުމާއި، ނިކަމެތިންނަށް އެހީވުމުގެ ސަވާބާއި ދަރުމަ ރަމަޟާންމަހު ވަކިންބޮޑަށް އިތުރުވެގެންދާކަމަށް ޢިލްމުވެރިން ވިދާޅުވެއެވެ.
ޢީދުގައި ކުރަންޖެހޭ އެންމެފުރަތަމަ ކަމަކީ ޢީދުނަމާދެވެ. ޢީދު ނަމާދަށް ދިއުމަށް ފެންވަރައި ސާފުތާހިރުވުމާއި ހުވަނދުލައި ގައިން މީރުވަސްދުއްވުމާއި، ނަލަހެދި ޒީނަތްތެރިވުމަކީ ސުންނަތްވެގެންވާ ކަންކަމެވެ. މިއީ މިކަމުގެ ސަބުން މީސްތަކުންގެ މެދުގައި އުފާވެރިކަން އާލާވެގެންދާނެކަންކަމެވެ. ޢީދު ނަމާދާއެކު މުޅި ޢީދުގައި ތަކުބީރުގެ އަޑުއުފުލަންޖެހެއެވެ. އަޑުހަރުކޮށް ޢީދުތަކުބީރު ކިއުމަކީ ކުރަންޖެހޭކަމެކެވެ. ބޮޑުޖަމާޢަތުގައި ޢިދު ނަމާދުކުރުމާއި، ޢާއިލާއާއެކު ކުޑަކުދިން ނަމާދަށް ގެންދިއުމަކީވެސް މުހިންމުކަމެކެވެ.
ޢީދުގައި އުފާފާޅުކުރުމަށް ވަކި އިންތަކެއް ކަނޑައަޅުއްވާފައިވެއެވެ. ޢީދުކުޅިވަރާއި އުފާފާޅުކުރުންތަކުގައި އަދަބު އަޚްލާޤު ހިފެހެއްޓުމާއި، އިސްލާމްދީނުގެ ތަރަހައިން ބޭރުނުވުމަށް ހަނދާންކުރަންޖެހެއެވެ. މީގެއިތުރުން އެކަކު އަނެކަމަށް އިޙްތިރާމްކުރުމާއި، މުޖުތަމަޢުގެ އަޚްލާޤީ މިންގަނޑުގެ ތެރޭގައި އުފާކުރުމަށްވެސް ސަމާލުކަން ދޭންޖެެހެއެވެ.
އިސްލާމީ އުސޫލުތަކުގެ ތެރޭގައި ޢީދު ފާހަގަކުރުމަކީ ޢީދުގެ މަޤުސަދު ޙާސިލްވެ މާތްﷲ އަޅުގަނޑުމެންނަށް މިންވަރުކުރެއްވި ރަމަޟާންމަހުގެ ދަރުމަ އެންމެފުރިހަމަގޮތުގައި ލިބިގަތުމަށްޓަކައި ކޮންމެހެން ކުރަންޖެހޭކަމެކެވެ.