ދެކުނު އޭޝިއާގެ ޤައުމުތަކާއި އެކު ވިޔަފާރި ކުރުމުގައި ދިވެހިންނަށް ހުރި ދަތިތައް ޙައްލުކުރުމާ ގުޅޭގޮތުން " ޗައިނާ ސައުތު އޭޝިއާ ކޯރޕަރޭޝަން" ފޯރަމްގައި މަޝްވަރާކޮށްފިއެވެ.
މި ފޯރަމްގައި ރާއްޖޭގެ ފަރާތުން އިސްބޭފުޅެއްގެގޮތުގައި ބައިވެރިވެވަޑައިގެންފައިވަނީ އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ އާދަމް ތައުފީޤެވެ.
ޗައިނާގެ ޔުނާން ޕްރޮވިންސްގެ ޔޫޝީ ސިޓީގެ"ހިލްޓަން ޔުންޝީ ފޫޝިއާން ލޭކް ހޮޓެލް"ގައި ބޭއްވި ޗައިނާ ސައުތު އޭޝިއާ ކޯރޕަރޭޝަން ފޯރަމްގެ ފުރަތަމަ ބައްދަލުވުމުގައި ދެކުނު އޭޝިއާގެ ހުރިހާ ޤައުމަކުންހެން ބައިވެރިވެފައިވެއެވެ. މި ބައްދަލުވުމުަގއި ބައިވެރިވެފައި ނުވަނީ ބޫޓާނުން އެކަންޏެވެ.
ޗައިނާގައި އަހަރަކު އެއްފަހަރު ބާއްވާ ކުންމިންގ ފެއަރއާ ގުޅުވައިގެން ބާއްވާފައިވާ "ޗައިނާ ސައުތު އޭޝިއާ ކޯރޕަރޭޝަން ފޯރަމްގެ ތެރެއިން 3 ބައްދަލުވުމެއް ކުރިއަށް ގެންގޮސްފައިވެއެވެ.
އެ 3 ބައްދަލުވުމަކީ ޗައިނާ ސައުތު އޭޝިއާ ހައި ލެވަލް ރައުންޑު ޓޭބަލް މީޓިންގ، ފައިނޭންޝިއަލް ކޯރޕަރޭޝަން ޑިވެލޮޕްމަންޓް ސްޓްރެޓަޖީ ސެމިނަރ އަދި ޗައިނާ ސައުތު އޭޝިއާ ލޯކަލް ގަވަރމަންޓު ލީޑަރސް ޑައިލޮގްއެވެ. މި ތިން ބައްދަލުވުމުގައިވެސް ރާއްޖެއިން ބައިވެރިވެފައިވެއެވެ.
މި ތިން ބައްދަލުވުމުގެ ތެރެއިން އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ އާދަމް ތައުފީޤް ބައިވެރިވެވަޑައިގެންފައިވަނީ ޗައިނާ ސައުތު އޭޝިއާ ހައި ލެވަލް ރައުންޑު ޓޭބަލް މީޓިންގައެވެ. މި ބައްދަލުވުމުގައި ޑެޕިއުޓީ މިނިސްޓަރ ވަނީ ކީ ނޯޓު ސްޕީކަރއެއްގެ ގޮތުގައިވެސް ވާހަކަދައްކަވާފައެވެ.
ފޯރަމްގެ ތެރެއިން ޕީއެސްއެމް ނިއުސްއަށް ދެއްވި އިންޓަރވިއުއެއްގައި ޑެޕިއުޓީ މިނިސްޓަރ އާދަމް ތައުފީގު ވަނީ ދިވެހި ވިޔަފާރިވެރިންނަށް އެހެން ޤައުމުތަކާއި އެކު ވިޔަފާރި ކުރުމުގައި ދަތިތައް ހުރިކަން ފާހަގަކުރައްވާފައެވެ. އަދި މި ފޯރަމްގައި މި ދަތިތައް ހައްލުކުރުމަށްޓަކައި ޤައުމުތަކާއި އެކު މަޝްވަރާކުރާނެ ކަމަށް ޑެޕިއުޓީ މިނިސްޓަރ ވިދާޅުވިއެވެ.
"އަޅުގަނޑުމެންނަކީ ހުރިހާ ޤައުމަތަކަކާވެސް ގުޅިގެން މަސައްކަތްކުރަމުންދާ ޤައުމަކަށްވާއިރު، އަޅުގަނޑުމެންނަށް މިހުރި ބައެއް ކަހަލަ ދަތިތަކާއި ގޮންޖެހުންތައް އެބަހުރި، ޤައުމުތަކާއެކު ވިޔަފާރި ކުރުމުގައި އެކަންތައްތަށް ހައްލު ކުރުމުގައި މި ފޯރަމްގައި ބައިވެރިވެފައިވާ ޤައުމުތަކާއި އެކު މަޝްވަރާ ކުރިއަށް ގެންދާނަން" އާދަމް ތައުފީޤު ވިދާޅުވިއެވެ.
ޗައިނާ ސައުތު އޭޝިއާ ކޯރޕަރޭޝަން ފޯރަމަކީ ކުރިމަގުގައި މި ސަރަޙައްދުގެ ޤައުމުތަށް ވިޔަފާރީގެ ދާއިރާއިން އިތުރަށް ގުޅުން ބަދަހިވެ، ވިޔަފާރީގެ ދާއިރާ އިތުރަށް ހަރުދަނާކުރުމަށް މުހިންމު ފިޔަވަޅުތަކެއް މި ފޯރަމްގެ ސަބަބުން އެޅިގެންދާނެކަމަށް ޤަބޫލު ކުރާކަމަށްވެސް އާދަމް ތައުފީޤު ވިދާޅުވިއެވެ.
މިމަހުގެ ވިހި ވަނަ ދުވަހުގެ ނިޔަލަށް ކުރިއަށްދާ ފަސް ވަނަ ޗައިނާ - ސައުތު އޭޝިއާ އެކްސްޕޯ، ކުންމިންގ ފެއަރގައިވެސް ރާއްޖެއިން ވަނީ ބައިވެރިވެފައެވެ. " ޗައިނާ ސައުތު އޭޝިއާ ކޯރޕަރޭޝަން" ފޯރަމްގައި ސައުތު އޭޝިއާ އަދި ސައުތު އީސްޓު އޭޝިއާގެ ޤައުމުތަކުގެ މިނިސްޓަރުން ފެންވަރުގެ ބޭފުޅުން ބައިވެރިވެފައިވާކަން ފާހަގަކޮށްލެވެއެވެ. ކާމިޔާބު ފޯރަމެއްގެ ގޮތުގައި މިއަހަރުގެ ފޯރަމް ނިންމާލާފައިވާއިރު ކޮންމެ އަހަރަކުވެސް މި ފޯރަމް ބޭއްވުމަށް ވަނީ ނިންމާފައެވެ.