"ފޯރަމް ފޯރ ކޯޕަރޭޝަން އޮން ޓޫރިޒަމް ބިޓްވީން ޗައިނާ އެންޑް މޯލްޑިވްސް"ގެ ބައިވެރީން ރާއްޖެ އަތުވެއްޖެ

ފަތުރުވެރިކަމުގެ ދާއިރާއިން ރާއްޖެއާއި ޗައިނާގެ ގުޅުން ބަދަހިކުރުމަށް ބާއްވާ، "ފޯރަމް ފޯރ ކޯޕަރޭޝަން އޮން ޓޫރިޒަމް ބިޓްވީން ޗައިނާ އެންޑް މޯލްޑިވްސް"ގައި ބައިވެރިވާ ޗައިނާ ވަފުދުގެ ބޭފުޅުން ރާއްޖެވަޑައިގެންފިއެވެ.

ކުރުނބާ މޯލްޑިވްސް ރިސޯޓުގައި މާދަމާ ފަށާ މިބަދަލުވުމުގައި ބައިވެރިވަނީ ފަތުރުވެރިކަމުގެ ދާއިރާގެ ބޭފުޅުންނެވެ. އެގޮތުން ޗައިނާ ވަފުދުގައި ހިމެނެނީ އެޤައުމުގެ ޓޫރިޒަމް މިނިސްޓްރީއާއި ފަތުރުވެރިކަމުގެ ދާއިރާގެ އިސްބޭފުޅުންނެވެ. ޗައިނާ ވަފުދުގައި ހިމެނޭ ބޭފުޅުންނަށް ރާއްޖެއިން މަރުޚަބާ ދެންނެވީ ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ ހުސައިން ލިރާރްއެވެ. "ފޯރަމް ފޯރ ކޯޕަރޭޝަން އޮން ޓޫރިޒަމް ބިޓްވީން ޗައިނާ އެންޑް މޯލްޑިވްސް"ގެ ނަމުގައި ބާއްވާ މިފޯރަމަކީ ޓޫރިޒަމް މިނިސްޓްރީއާއި ޗައިނާގެ މިނިސްޓްރީ އޮފް ކަލްޗަރ އެންޑް ޓޫރިޒަމް އަދި ރާއްޖޭގައި ހުންނަ ޗައިނާގެ އެމްބަސީ ގުޅިގެން ބާއްވާ ފޯރަމެކެވެ.

މިފޯރަމްގައި ފަތުރުވެރިކަމާ ގުޅުން ހުރި ފަރާތްތަކުން ރާއްޖެއާއި ޗައިނާއާ ދެމެދު މިދާއިރާއިން އިތުރަށް ގުޅުން ބަދަހިކޮށް މި ދާއިރާގި ހުރި އިންވެސްޓްމަންޓް ފުރުޞަތުތަކާ ބެހޭގޮތުން މަޝްވަރާކުރާނެއެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ ހުސައިން ލިރާރު ވިދާޅުވީ މި ފޯރަމުގައި ޗިއިނާއިން ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް މަޝްވަރާކުރުމަށް ހަމަޖެހިފައިވާކަމަށެވެ.

މި ފޯރަމްގައި ބައިވެރިވާ ޗައިނާގެ ވަފުދުގައި ފަތުރުވެރިކަމާ ގުޅުންހުރި ދާއިރާތަކުގެ 100 ބޭފުޅުން ހިމެނެއެވެ.