މަތީ ތަޢުލީމް ހާސިލްކުރާ ދަރިވަރުންގެ ތެރެއިން ސަރުކާރުގެ ލޯނު އެހީ ލިބުނު ދަރިވަރުންނަށް އެކަމުގެ ލިޔުން ހަވާލުކުރަން ފަށައިފިއެވެ.
މަތީ ތަޢުލީމުގެ ލޯނު ލިބުނުކަމުގެ ލިޔުން ބައެއް ދަރިވަރުންނާއި ހަވާލުކޮށްފައިވާއިރު، ރަސްމީކޮށް ލޯން ލިބުނު ކަމުގެ ލިޔުން ދޫކުރަންފަށާނީ އަންނަ އާދިއްތަ ދުވަހުކަމަށް ޑިޕާރޓްމަންޓް އޮފް ހަޔަރ އެޑިއުކޭޝަނުން ބުނެއެވެ. މީގެ ކުރިން ލޯނު ލިބުނު ދަރިވަރުންނަށް ލިޔުން ހަވާލުކުރަނީ އެކަމަށް ޚާއްޞަކޮށްގެން ބާއްވާ ޚަފުލާއެއްގައެވެ. ނަމަވެސް ދަރިވަރުންނަށް ފަސޭހަކޮށްދިނުމުގެ ގޮތުން މިއަހަރު ލޯނު ލިބޭ ދަރިވަރުންގެ ދާއިމީ ލިސްޓް އާއްމުކުރުމާއެކު، ލޯނު ލިބުނު ކަމުގެ ލިޔުން ހަވާލުކޮށް އިޤުރާރުގައި ސޮއިކުރާ ގޮތަށް ވަނީ ހަމަޖައްސާފައެވެ.
މިދިޔަ މާޗުމަހު ހުޅުވާލި ދަރިވަރުންގެ ލޯނު ސްކީމުގައި 500އަށްވުރެ ގިނަ ދަރިވަރުން ފޯމް ހުށައަޅާފައިވާފައިވާ ކަމަށް ޑިޕާރޓްމަންޓް އޮފް ހަޔަރ އެޑިއުކޭޝަނުން ބުނެއެވެ. އެ ޑިޕާރޓްމަންޓްއިން ބުނީ ލޯނު ލިބޭ ދަރިވަރުންގެ ފައިނަލް ލިސްޓް އާއްމުކޮށް އެކަމުގެ ލިޔުން ހަވާލުކުރަން ގިނަ ދުވަސްތަކެއް ނަގާކަމަށާއި އެކަމުގެ ސަބަބުން ކިޔަވަން ދާން ބޭނުންވާ ދަރިވަރުންނަށް އުނދަގޫތަކާ ކުރިމަތިވާކަމަށެވެ. އެގޮތުން ދަރިވަރުންނަށް ފަސޭހަކޮށްދިނުމުގެ ގޮތުން ހަޔަރ އެޑިއުކޭޝަނުން ލޯނު ލިބުނުކަމުގެ ލިޔުން ދޫކުރަން ހަމަޖައްސާފައިވާކަމަށް އެޑިޕާރޓްމަންޓްއިން ބުނެއެވެ.
ސަރުކާރުން ވަނީ މަތީ ތަޢުލީމުގެ ލޯނަށް ޝަރުތު ހަމަވާ ހުރިހާ ދަރިވަރުންނަށް ލޯނު ދޭން ނިންމައިފައެވެ. މިގޮތުން ލޯނަށް ކުރިމަތިލާ ދަރިވަރުންގެ ތެރެއިން ޝަރުތު ހަމަވާ 500 އަށްވުރެ ގިނަ ދަރިވަރުންނަށް ލޯން ދޫކުރާނެއެވެ. މިފަހަރު ލޯން ދޫކޮށްފައިވަނީ ރާއްޖޭގެ އިތުރުން ސާކުގެ އަށް ގައުމާއި ޗައިނާ އާއި މެލޭޝިޔާއާއި ޕިލިޕީންސް އަދި ތައިލެންޑުގައި ކިޔެވުމަށެވެ. މަތީ ތަޢުލީމު ހާސިލްކުރަން ލޯނު ދިން ދާއިރާތަކުގެ ތެރޭގައި ޕައިލެޓް ޓްރެއިނިންގ އާއި ނަރސިންގ އާއި ޓީޗިންގެ އާއި މެޑިސިންގ އަދި މި ނޫންވެސް، ސްކިލް ޝޯޓޭޖް ލިސްޓުގައި ހިމެނޭ ދާއިރާތައް ހިމެނެއެވެ.