ރާއްޖޭގައި ހުންނަ ޕާކިސްތާން އެމްބަސީއާއި ހެލްތް މިނިސްޓްރީ ގުޅިގެން ބާއްވާ މެޑިކަލް ކޭމްޕް ފަށައިފިއެވެ.
މި ކޭމްޕް ފެށުމަށް ބޭއްވި ރަސްމިއްޔާތުގައި ހެލްތް މިނިސްޓްރީގެ ސްޓޭޓް މިނިސްޓަރ ޑރ.ޢާއިޝަތު ރަމީލާ ބައިވެރިވެ ކޭމްޕްގައި ހަރަކާތްތެރިވާ ޑޮކްޓަރުންނަށް ވަނީ އަގުވަޒަންކުރުމުގެ ގޮތުން ހަނދާނީ ފިލާ ދީފައެވެ. މިރަސްމިއްޔާތުގައި ޕާކިސްތާނުން ރާއްޖެއަށް ކަނޑައަޅުއްވާފައި ހުންނަ ސަފީރު ވައިސް އެޑްމިއަރ ރިޓަޔާރޑް ވަސީމް އަކްރަމް ބައިވެރިވެވަޑައިގެންނެވިއެވެ.
މިމަހުގެ 8 އިން 13 އަށް ކުރިއަށް ގެންދާ މިކޭމްޕުގައި ޕާކިސްތާނުގެ ސުޕަރސްޕެޝަލިސްޓް ޑޮކްޓަރުން ބައިވެރިވެ، މީހުންބަލައި ފަރުވާ ދޭނެއެވެ. މެޑިކަލް ކޭންޕްގައި އެކި ދާއިރާތަކުން ޕާކިސްތާނުގެ 7 ސުޕަރސްޕެޝަލިޓް ޑޮކްޓަރުން ބައިވެރިވެއެވެ. ކެންޕުގައި ޑޮކްޓަރުންނަށް ދެއްކުން ކުރިއަށްދާ، ކޭމްޕުކުރިއަށް ގެންދިއުމަށް ހަމަޖެހިފައިވާ ރަށްރަށުގެ ހޮސްޕިޓަލުތަކުގައެވެ.
މި ކޭމްޕްގައި ނާރުގެ ބަލިތަކާއި އީ.އެން.ޓީ ފަދަ ބަލިތަކަށް ސްޕެޝަލިސްޓުން ބަލަމުންގެންދާނެއެވެ.
މެޑިކަލް ކޭންޕާބެހޭ ގޮތުން ހެލްތް މިނިސްޓްރީން ބުނީ މި ކޭމްޕްގައި ބައިވެރިވާ ޑޮކްޓަރުންނަކީ ދުނިޔޭގެ ބޮޑެތި ޤައުމުތަކުގައި މަސައްކަތްކޮށްފައިވާ އަދި މިހާރުވެސް މަސައްކަތްކުރަމުންދާ ޑޮކްޓަރުން ކަމަށާ، ކޭންޕު މެދުވެރިކޮށް ފަސޭހަކަމާއެކު ޑޮކްޓަރަށް ދެއްކުމާއި ޑޮކްޓަރުންގެ ލަފާހޯދުމުގެ ފުރުޞަތު ލިބޭނެކަމަށެވެ. މެޑިކަލް ކޭންޕު ކުރިއަށް ގެންދިއުމަށް ހަމަޖެހިފައިވާ ތަންތަނަކީ އައިޖީއެމް ހޮސްޕިޓަލާއި ކުޅުދުއްފުށީ ރީޖަނަލް ހޮސްޕިޓަލާއި ލ.ގަމު ރީޖަނަލް ހޮސްޕިޓަލާއި ހއ.އަތޮޅު ހޮސްޕިޓަލާއި ފ. އަތޮޅު ހޮސްޕިޓަލާއި ދ. އަތޮޅު ހޮސްޕިޓަލްގެ އިތުރުން ތ. އަތޮޅު ހޮސްޕިޓަލެވެ.