އިސްލާމީ ހޭލުންތެރިކަމާއި ބެހޭ ބައިނަލްއަޤުވާމީ ތިންވަނަ މަހާސިންތާ ނިންމާލައިފިއެވެ.
ދެދުވަހުގެ މުއްދަތަށް ކުރިއަށްގެންދިޔަ މި މަހާސިންތާއަކީ އިސްލާމިކް ޔުނިވަރސިޓީއާއި އެމެރިކާގެ އިންޓަރނޭޝަނަލް އިންސްޓިޓިއުޓްއޮފް އިސްލާމިކް ތޯޓް ގުޅިގެން ކުރިއަށްގެންދިޔަ މަހާސިންތާއެކެވެ.
މި މަހާސިންތާ ކުރިއަށްގެންގޮސްފައިވަނީ "ޞުލްޙައާއި ހަމަޖެހުމާއި ތަޙައްމަލުކުރުން ދެކުނު އޭޝިއާގައި ޤާއިމްކުރުމުގައި އިސްލާމީ ފިކުރާއި ޘަޤާފަތާއި ޙަޟާރާތުގެ ދައުރު" މި ޝިޔާރުގެ ދަށުންނެވެ.
ދެދުވަހުގެ މުއްދަތަށް ކުރިއަށްގެންދިޔަ މި މަހާސިންތާގައި އިސްލާމީ ވިސްނުމާއި ޘަޤާފަތާއި ޙަޟާރާތުގެ ދައުރަށް ޢިލްމީ ދިރާސާތަކަށް ވަނީ ހުށަހަޅާފައެވެ. މީގެ އިތުރުން ކުރިއަރަމުންދާ އިޤްތިޞާދީ އަދި މާލީ ނިޒާމާއި ބަދަލުވަމުންދާ ސިޔާސީ ނިޒާމާއި ތަޢުލީމީ ދާއިރާ ބައްޓަންކުރުމަށްވެސް ވަނީ ކަރުދާސް ހުށައަޅާފައެވެ.
އިޖްތިމާޢީ އަދި އިޤްތިޞާދީ ކަންކަމުގައި އަންހެނުންގެ ބައިވެރިވުން އިތުރުކުރުމަށް ދިރާސާ ކަރުދާސް ހުށައަޅާފައިވާއިރު ދީންތަކުގެ މެދުގައި ހަމަޖެހުމާއި ސުލްޙަވެރިކަން ދެމެހެއްޓުމާ ގުޅެ ކަރުދާސްތަކެއް ވަނީ ހުށައަޅާފައެވެ. މިގޮތުން 43 ކަރުދާސް ހުށައަޅާފައިވާއިރު މީގެތެރޭގައި، މި ކޮންފަރެންސްގައި ބައިވެރިވާ ބޭރުގެ އެކި ޤައުމުތަކުގެ ބޭފުޅުން ހުށައެޅި، 37 ކަރުދާހަކާއި ރާއްޖޭގެ 6 ބޭފުޅަކު ހުށަހެޅި ކަރުދާސް ހިމެނެއެވެ. ރާއްޖެއިން ކަރުދާސް ހުށައަޅާފައިވަނީ އައިޔޫއެމްގެ ދަރިވަރުންނާއި ލެކްޗަރާއިންނެވެ.
މަހާސިންތާ ނިންމާލުމަށްފަހު ނޫސްވެރިންނަށް މަޢުލޫމާތުދެއްވަމުން އައިޔޫމއެމްގެ ރިސާރޗް އެންޑް ޕަބްލިކޭޝަންސްގެ ޑީން ޑރ.ދީބާ މޫސާ ވިދާޅުވީ މިފަދަ މަހާސިންތާތަކަކީ ރާއްޖެއަށް ބޭނުންތެރި މަހާސިންތާތަކެއްކަމަށާއި އަންނަ އަހަރުގެ މި މަހާސިންތާ މިއަށްވުރެ ފުރިހަމަކޮށް ކުރިއަށްގެންދިޔުމަށް މަޝްވަރާކުރައްވަމުންދާކަމަށެވެ.
މަހާސިންތާގައި ހުށަހެޅި ޢިލްމީ ދިރާސާތަކުގެ ތެރެއިން ހޮވާލެވޭ ކަރުދާސްތައް އިސްލާމީ ޔުނިވަރސިޓީގެ ޖާނަލް ،ޖާމިޢާގައި ޝާއިޢު ކުރާނެކަމަށް އެ ޔުނިވަރސިޓީން ބުނެއެވެ. މިމަހާސިންތާގައި ކީނޯޓް ދީފައިވަނީ ސިވިލް ސަރވިސް ކޮމިޝަންގެ ރައީސް ޑރ.ޢަލީ ޝަމީމްއާއި ޕާކިސްތާނުގެ ރިފާ އިންތާރނޭޗަނަލް ޔުނިވަރސިޓީގެ ފައުންޑަރ އަދި ވައިސްޗާންސެލަރ ޕްރޮފެސަރ ޑރ.އަނިސް އަޙްމަދު އަދި އިންޓަރނޭޝަނަލް އިންސްޓިޓިއުޓްއޮފް އިސްލާމިކް ތޯޓްގެ ފަރާތުން ޕްރޮފެސަރ.ޑރ.އުމަރު ޙަސަން ކަސޫލްއެވެ. މި މަހާސިންތާގައި 200 އަށްވުރެ ގިނަ މީހުން ބައިވެރިވެފައިވާއިރު 12 ޤައުމެއްގެ ޢިލްމީ ބޭފުޅުން ބައިވެރިވިއެވެ.