ދަޢުލަތުގައި ލިބެން ހުރި ހުރިހާ ވަސީލަތްތައް ބޭނުންކޮށްގެން ކަސްޓަމްސްގެ ޚިދުމަތަށް އެހީތެރިވުމަށް މި ސަރުކާރުން މަސައްކަތްކުރައްވާނެކަމަށް މިނިސްޓަރ އޮފް ހޯމް އެފެއާޒް އަޒްލީން އަޙްމަދު ވިދާޅުވެއެއްޖެއެވެ.
މޯލްޑިވްސް ކަސްޓަމްސްގެ ޚިދުމަތަށް 128 އަހަރު ފުރުމުގެ ގޮތުން މޯލްޑިވްސް ކަސްޓަމްސް ސަރވިސްގެ މައި އޮފީހުގައި ބޭއްވި ދިދަ ނެގުމުގެ ޚާއްސަ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުން މިނިސްޓަރ އަޒްލީން ވިދާޅުވީ ކަސްޓަމްސްގެ ގިނަދުވަސްވީ ޚިދުމަތްތަކަށް ތަރައްޤީ އައިސްފައިވާކަމަށާއި ކުރިއަށް އޮތް އަހަރަކީވެސް ކަސްޓަމްގެ ޚިދުމަތްތަކަށާއި ކުންފުނީގެ މުވައްޒަފުންނަށް އިތުރު ތަރައްޤީ އަންނާނެ އަހަރަކަށް ވާނެކަމަށެވެ.
ރާއްޖޭގެ ރައްޔިތުންނަށް ހަމަޖެހުން ގެނެސްދިނުމުގައި ކަސްޓަމްސްގެ ރޯލް ބޮޑުކަން ފާހަގަކޮށް މިނިސްޓަރ ވިދާޅުވީ ކަސްޓަމްސްގެ އިޚްލާސްތެރި މަސައްކަތުން ރާއްޖެއަށް ކުރިމަތިވެފައިވާ އެންމެބޮޑު އެއްވަބާކަމަށްވަ މަސްތުވާތަކެތި ރާއްޖެއަށް އެތެރެވިޔަނުދީ އެކަންކުރުން ހުއްޓުވުމަށްޓަކައި ކަސްޓަމްސްގެ މުވައްޒަފުން ކުރަމުންދާ މަސައްކަތްތަކުގެ އަގު ވަޒަންކުރަންޖެހޭކަމަށެވެ.
މި ރަސްމިއްޔާތުގައި ވާހަކަފުޅުދައްކަވަމުންކޮމިޝަނަރ ޖެނަރަލް އޮފް ކަސްޓަމްސް މުޙައްމަދު ޖުނައިދު ވިދާޅުވީ ކަސްޓަމަސްގެ މުވައްޒަފުން ކުރަމުންދާ މަސައްކަތްތަކާ އެކަށީގެންވާ އުޖޫރެއް ހޯދައިދިނުމަށް މަސައްކަތް ކުރައްވަމުންދާކަމަށެވެ. ކަސްޓަމްސްއަކީ ޒިންމާދާރު ކުންފުންޏެއްކަމަށާއި އެމުއައްސަސާގެ ވަޒީފާއަށް އެދޭ މީހުން ގިނަކަންވެސް އޭނާ ފާހަގަކުރެއްވިއެވެ.
ދިވެހި ކަސްޓަމްސްގެ ޚިދުމަތް ދިނުމަށް ފުރަތަމަ އޮފީހެއް ޤާއިމުކޮށްފައިވަނީ މީލާދީން 1890 ވަނަ އަހަރުއެވެ. ކަސްޓަމްސްގައި 700 އަށްވުރެ ގިނަ މުވައްޒަފުން މަސައްކަތް ކުރަމުންދާއިރު މި މުއައްސަސާގެ 8 އޮފީސް ރާއްޖޭގެ އެކި ކަންކޮޅުތަކުގައި ޤާއިމު ކުރެވިފައިވާ ކަމަށް ކަސްޓަމްސްއިން ބުނެއެވެ. މިރަސްމިއްޔާތުގައި ދުވަހާ ގުޅޭގޮތުން ޚާއްސަ ދުޢާއެއްވަނީ ކޮށްފައެވެ.