ވިޔަފާރީގެ ބޭނުންތަކަށް އައްޑޫ ސިޓީން ބިން ދޫކުރުމަށް ހައުސިން މިނިސްޓްރީން ނިންމައި އެކަން އިޢުލާންކޮށްފިއެވެ.
ހައުސިން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރ ޑރ. މުޙައްމަދު މުއިއްޒު ވިދާޅުވީ އައްޑޫ ސިޓީގެ ރަށްތަކުގައި ދިރިއުޅޭ ރައްޔިތުންނަށް ވިޔަފާރި ކުރުމަށް ބޭނުންވާ ފަރާތްތަކަށް އަންނަ އާދިއްތަ ދުވަހުން ފެށިގެން ފޯމް ދޫކުރާނެ ކަމަށެވެ.
މިނިސްޓަރ މުއިއްޒު ވިދާޅުވީ ވިޔަފާރި ކުރުމަށް މަދުވެގެން 64 ބިން އައްޑޫ ސިޓީން ދޫކުރާނެ ކަމަށެވެ. އޭގެތެރެއިން 25 ބިން ދޫކުރުމަށް ހަމަޖެހިފައިވަނީ ފޭދޫއިން އަލަށް ހިއްކާފައިވާ ސަރަޙައްދުގައި ކަމަށެވެ.
ބިން ދޫކުރުމަށް ހަމަޖެހިފައިވާ އަގުތައް:
• ބަނދަރު ސަރައްދުން އަކަފޫޓަކަށް 3 ރުފިޔާ
• ލިންކް ރޯޑް ސަރަހައްދުން 2.6 ރުފިޔާ އަކަފޫޓަކަށް
• އީސީސީގައި ހަދާ ހޮސްޕިޓަލް ސަރަހައްދުން އަކަފޫޓަކަށް 2.2 ރުފިޔާ
• އެހެނިހެން ސަރަހައްދުތަކުން އަކަފޫޓަކަށް 1.8 ރުފިޔާ
ހައުސިން މިނިސްޓަރ މުއިއްޒު ވިދާޅުވީ އައްޑޫ ސިޓީގައި ވިޔަފާރި ކުރުމަށް ބިން ދޫކުރުމަށް ކަނޑައަޅާފައި ވަނީ ވިޔަފާރި ކުރަން ބޭނުންވާ މީހުންނާއި ވިޔަފާރިވެރިންނަށް ފަސޭހަވާނެ ގޮތަށް ކަމަށެވެ. އަދި އެ ކަމަކީ ރައީސް ޢަބްދުﷲ ޔާމީންގެ އިސްނެންގެވުމުގެ މަތިން އަލަށް ވިޔަފާރި ކުރުމަށް އައްޑޫ ސިޓީން ބޭނުންވާ މީހުންނަށް ހުޅުވާލި ފުރުޞަތެއް ކަމަށްވެސް މިނިސްޓަރ މުޢިއްޒު ވިދާޅުވިއެވެ.