މާލެއަތޮޅު ހުރައަށް ދިމާވެފައިވާ ބިމުގެ ދަތިކަން ޙައްލުކުރުމަށްޓަކައި އެރަށު ބިންހިއްކުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފިއެވެ. ހައުސިން މިނިސްޓްރީގައިއޮތް ރަސްމިއްޔާތެއްގައި މި އެއްބަސްވުމުގައި ސޮއިކުރެއްވީ މިނިސްޓަރ އޮފް ހައުސިން އެންޑް އިންސްފްރާސްޓަރަކްޗަރ ޑރ.މުހައްމަދު މުއިއްޒެވެ. އެމްޓީސީސީން ސޮއިކުރެއްވީ އެ ކުންފުނީގެ ސީއީއޯ އިބްރާހީމް ޒިޔަތެވެ.
ސަރުކާރުގެ ބަޖެޓުން ގާތްގަޑަކަށް 33 މިލިޔަން ރުފިޔާ ޚަރަދުކޮށްގެން 10 ހެކްޓަރުގެ ބިން ހިއްކުމަށް ހަމަޖެހިފައިވެއެވެ. ހައުސިން މިނިސްޓަރ ޑރ.މުޙައްމަދު މުއިއްޒު ވިދާޅުވީ މި މަސައްކަތް އެމްޓީސީސީއާ ހަވާލުކޮށްފައިވަނީ 6 މަސްދުވަހު ތެރޭ ނިންމާ ގޮތަށްކަމަށެވެ. މަސައްކަތް ކުރުމަށް އީއައިއޭގެ މަސައްކަތް ބަޔަކާ މިހާރު ހަވާލުކޮށްފައިވާނެކަމަށާ، މަސައްކަތް ނިންމައި ބަންޑްވޯލް ޖެހުމުގެ މަސައްކަތާއި ހިއްކުމުގެ މަސައްކަތް ފަށާނެކަމަށް އެފަރާތުން ބުނެއެވެ. މިނިސްޓަރ ވިދާޅުވީ ހުރާ ބިންހިއްކުމުން އެރަށުގެ ބިމުގެ ދަތިކަމަށް ހައްލެއް ލިބިގެންދާނެކަމަށެވެ.
އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން އެމްޓީސީސީގެ ސީއީއޯ އިބްރާހީމް ޒިޔަތު ވިދާޅުވީ މި މަސައްކަތްވެސް ކުރުމަށް ހަމަޖެހިފައިވަނީ މަހާޖައްރާފު ބޭނުންކޮށްގެންކަމަށެވެ. ޒިޔަތު ވިދާޅުވީ ދެދުވަހުގެ ތެރޭގައި އެއް ހެކްޓަރގެ ބިން ހިއްކާލެވޭނެކަމަށާ، އަމާޒަކީ 145 ދުވަހުގެ ކުރިން މަސައްކަތް ނިންމާލުންކަމަށެވެ. އަދި އީއައިއޭ ހަދައި ނިމުނުހާ އަވަހަކަށް ގާތްގަޑަކަށް 3 ދުވުހު ތެރޭގައި ބަންޑްވޯލް ޖެމުހުގެ މަސައްކަތް ފަށާނެކަމަށްވެސް ޒިޔަތު ވިދާޅުވިއެވެ.
ކ.ހުރާގައި 1064 މީހުން ރަޖިސްޓްރީވެފައި ވީނަމަވެސް ރަށު ކައުންސިލުން ޚިދުމަތް ދޭންޖެހޭ މިއަށްވުރެ ގިނަ މީހުން އެރަށުގައި ވަޒަންވެރިވެ ދިރިއުޅެމުންދާކަމަށް ރަށުކައުންސިލުން މަޢުލޫމާތުދެއެވެ. މިރަށުގެ ރައްޔިތުންގެ އިތުރުން އެހެނިހެން ރަށްރަށުގެ ރަށްޔިތުންވެސް މިރަށުގައި ދިރިއުޅެމުން ގެންދެއެވެ.