ރާއްޖޭގެ ސްކޫލުތަކުގައި މަސައްކަތްކުރާ ކައުންސެލަރުންނަށް އަމާޒުކޮށްގެން ޚާއްޞަ ތަމްރީން ޕްރޮގްރާމެއް ފަށައިފިއެވެ.
ސްކޫލް މާހައުލުގައި ދަރިވަރުންނަށް ދިމާވާ އެކިހަލަ ކަންތައްތައް އެންމެ އެކަށޭނަ ގޮތެއްގައި ކަމާގުޅުންހުރި މުއައްސަސާ ތަކާއި ގުޅިގެން ހައްލުކުރުމަށް ކުރެވިދާނެ ކަންތައްތަކަށް ކައުންސެލަރުން ހޭލުންތެރި ކުރުވުމަށް ކުރިއަށްގެންދާ މި ތަމްރީންތަކުގައި މިއަހަރު 33 ކައުންސެލަރުން ބައިވެރިވެއެވެ.
އެޑިއުކޭޝަން މިނިސްޓްރީން އިންތިޒާމުކޮށްގެން ކުރިއަށް ގެންދާ މި ތަމްރީނުތައް ކުރިއަށްދަނީ އަރަބިއްޔާ ސްކޫލުގައެވެ. މިއަދުން ފެށިގެން މިމަހުގެ 13 ވަނަ ދުވަހުގެ ނިޔަލަށް ކުރިއަށްގެންދާ މި ތަމްރީނުތަކުގައި މާލޭގެ އިތުރުން ރާއްޖޭގެ 9 ރަށެއްގެ ސްކޫލްތަކުން ބައިވެރިވެއެވެ. މިގޮތުން ޅ، މ، ދ، ތ، ލ، ގއ، ގދ ފުވައްމުލައް އަދި އައްޑޫސިޓީގެ ސްކޫލްތަކުގައި މަސައްކަތް ކުރާކައުންސެލަރުން މި ތަމްރީން ޕްރޮގްރާމްގައި ބައިވެރިވެއެވެ.
މި ތަމްރީން ޕްރޮގްރާމްގައި ކުޑަކުދިން ރައްކާތެރި ކުރުމަށް ހެދިފައިވާ ޤާނޫނުތަކާއި ޤަވާއިދުތަކަށް އަހުލުވެރި ކުރުމުގެ ސެޝަންތަކެއްވެސް ކުރިއަށްދާނެކަމަށް އެޑިއުކޭޝަން މިނިސްޓްރީން ބުނެއެވެ.
މީގެ އިތުރުން ސްކޫލް މާހައުލުގައި ދަރިވަރުންނަށް ދިމާވާ މައްސަލަތައް އެކުދިންނާއި ގުޅިގެން ހައްލު ކުރުމުގައި ކައުންސެލަރުންގެ ގާބިލްކަން އިތުރުކުރުންވެސް މި ތަމްރީން ޕްރޮގްރާމްގައި ކިޔައިދޭނެކަމަށް އެޑިއުކޭޝަން މިނިސްޓްރީން ބުނެއެވެ.
މި ތަމްރީން ޕްރޮގްރާމްގައި އެޑިއުކޭޝަން މިނިސްޓްރީގެ އިތުރުން، މޯލްޑިވްސް ޕޮލިސް ސަރވިސްއާއި މިނިސްޓްރީ އޮފް ޖެންޑަރ އެންޑް ފެމިލީއާއި ޖުވެނައިލް ޖަސްޓިސް ޔުނިޓާއި ސޮސައިޓީ ފޮރ ހެލްތް އެޑިއުކޭޝަނުންވެސް އެކި ސެޝަންތައް ނަގައިދިނުމަށް ހަމަޖެހިފައިވާކަމަށް އެޑިއުކޭޝަން މިނިސްޓްރީން ބުނެއެވެ.