އިދިކޮޅު ރިޔާސީ ކެންޑިޑޭޓް އިބްރާހީމް މުޙައްމަދު ޞާލިހް ކެމްޕޭން ދަތުރުތަކުގައި ރަށްތަކަށް ވަޑައިގެން ކުރައްވާ ވަޢުދުތަކަކީ ރާވައިގެން ކުރާ މަސައްކަތެއް ނޫންކަމަށާއި އެއީ ހަރުދަނާ ވަޢުދުތަކެއް ނޫންކަމަށް އެންވަޔަރަމަންޓް މިނިސްޓަރ ޠާރިޤް އިބްރާހީމް ވިދާޅުވެއްޖެއެވެ.
ހުވަދުއަތޮޅު ދެކުނުބުރީ މަޑަވެލި ގޮނޑުދޮށް ޙިމާޔަތްކުރުމުގެ މަޝްރޫޢުގެ ކާމިޔާބީފާހަގަކޮށް، އެރަށު ބަނދަރު ހުޅުވައިދެއްވުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ ޠާރިޤް ވިދާޅުވީ އިބްރާހީމް މުޙައްމަދު ޞާލިހް ކެމްޕޭން ދަތުރުތަކުގައި ހަރުދަނާ ވަޢުދުތަކެއް ކުރައްވާތަން ފެނިވަޑައިނުގަންނަވާކަމަށާއި އެ ވަޢުދުތައް ކުރައްވަނީ އެއްވެސް ރޭވުންތެރިކަމެއް ނެތި ކަމަށެވެ.
މިނިސްޓަރ ވިދާޅުވީ ރައްޔިތުންނަށް ބޯހިޔާވަހިކަން ދެއްވާނެކަމަށް އިދިކޮޅު ކެނޑިޑޭޓް ވިދާޅުވާއިރު، ބޯހިޔާވަހިކަން ދެއްވާނީ ކޮންތަނަކުން ކިހާޢަދަދެއްގެ ރައްޔިތުންނަށްކަން ސާފުކޮށްދޭންޖެހޭނެކަމަށް މިނިސްޓަރ ވިދާޅުވިއެވެ. އަދި މިފަދަ ތާކުންތާކުން ނުޖެހޭ ވަޢުދުތައް ކުރައްވާ ބޭފުޅަކަށް ރައްޔިތުން ވޯޓުދެއްވާނެކަމަށް ދެކެވަޑައިނުގަންނަވާކަމަށްވެސް އެންވަޔަރަމަންޓް މިނިސްޓާރ ޠާރިޤް އިބްރާޙިމް ވިދާޅުވިއެވެ. އަދި އެމްޑީޕީގެ ފިކުރުގެ ހުރި މީހަކަށް ޤައުމުގެ ހިންގުން ހަވާލުކޮށްފިނަމަ ޤައުމުދާނީ ފަހަތަށް ކަމަށާއި، މިއަހަރުގެ ރިޔާސީ އިންތިޚާބް ރައީސް ޔާމިން 75 އިންސައްތައިން ކާމިޔާބުކުރައްވާނެކަމަށްވެސް މިނިސްޓާރ ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ހައުސިން މިނިސްޓަރ ޑރ. މުޙައްމަދު މުއިއްޒު ވިދާޅުވީ އިދިކޮޅު ފަރާތްތަކާ ގުޅިފައިވާ ޤައުމުތަކާއި ޖަމާއަތްތަކުގެ ބޭނުމަކީ ރާއްޖޭގައި އެހެން ދީންތަކަށް ފުރުޞަތު ދިނުންކަމަށާއި، އެހެންކަމުން އިސްލާމްދީނާއި ޤައުމުގެ މިނިވަންކަމަށްޓަކައި ހުރިހާ ދިވެހި ރައްޔިތުން ރައީސް ޔާމީނާއެކު ކުރިއަށްދިޔުމަށް ޢަޒުމްކަނޑައެޅުމަށް މިނިސްޓަރ ޑރ. މުޙައްމަދު މުއިއްޒް ގޮވާލެއްވިއެވެ.
މަޑަވެލި ގޮނޑުދޮށް ޙިމާޔަތްކުރުމުގެ މަޝްރޫޢަށް 10 މިލިއަނަށްވުރެ ރުފިޔާ ސަރުކާރުން ޚަރަދުކޮށްފައިވާއިރު، މިމަޝްރޫއުގެ ދަށުން، މަޑަވެލީގެ ގިރާ ސަރަހައްދަށް 17 ހާސް ކޮޑިމީޓަރުގެ ވެލިއަޅައި، ރަށުގެ ގިރާ ސަރަހައްދުގައި ބޮޑު ހިލަ ޖަހައިގެން ވަނީ ހިމާޔަތްކޮށްފައެވެ.